之前呢間麵包店嘅五層流心芝士軟包掀起熱潮，Instagram 狂洗版，星期一至日都有人龍，韓國人都排埋一份。我覺得係幾好味嘅，不過要專登排隊買，食一次就夠～
話說麵包店昨日喺灣仔開分店，仲會喺呢間分店獨家推出呢個「五層流心芝士朱古力軟包」。嘩，我見到張相，即時兩眼發光，真心覺得好吸引，決定放工行去買！
分店大少少，一行入去，就會有試食區，原來新增咗蝴蝶酥。
中間放嘅就係招牌「五層流心芝士軟包」，右邊就係其他麵包。
不過可能4點先開張，唔係整咗好多嚟賣，所以麵包唔算多款式。
而分店最唔同嘅地方，就係多咗飲品部。宜家大家可以喺度買埋嘢飲，舖入面有２張高檯同櫈，各位食家可以將個包影返夠本先喇～
講返個包，個包比原味貴$3，換咗隻味多3蚊抵唔抵就要食過先知喇。
包裝：買咗一個但依然畀紙袋，唔使另外畀錢，仲貼埋 LOGO 貼紙。個 LOGO好似唔同咗，新 LOGO 望落 YOUNG 咗呢。
裡面附有軟包嘅食法。之前食過，最好食都係室溫食，唔知朱古力味又係唔係呢？一陣話你知，因為我又試咗。
賣相
同參考圖片相差好遠喎～我將我買嘅包點P，都P唔到好似參考圖片咁嘅顏色囉=.= 難怪我買個陣會質疑自己有無拎錯包～～仲以為自己記錯咗官方相嘅樣～～～
個包係朱古力味嘅，外面同芝士味一樣都係加咗類似奶粉嘅嘢。我就想問，點解唔係用古力粉呢？
試味
室溫食：外面除咗表面嘅粉，仲搽咗朱古力醬。而麵包中間就同樣係有2層朱古力味嘅餡，應該係朱古力溝芝士嘅忌廉，唔知係咪同埋芝士味一樣溝咗巴馬臣芝士粉、忌廉芝士同新西蘭軟芝士呢？
可能你會擔心朱古力味太濃，會苦，但呢個又唔會，但又唔會太甜，味道都幾多。不過我覺得朱古力芝士始終唔係好夾……成個都係朱古力可能會仲開心！
微波爐加熱食：完全唔好食呀……雖然係好流心，但就食到朱古力嘅苦澀味同芝士嘅酸味……我諗無人想咁掛？
雪凍食：嘩～呢個味雪凍食好味喎！我覺得好似食緊雪糕三文治咁呀～啲朱古力醬同中間嘅餡變到好滑，比雪凍食嘅芝士原味好味好多呢！可能因為芝士味同雪糕唔夾掛～
點食最好食？
原味： 買咗即食
朱古力味：雪凍當雪糕三文治食
一句講曬：原價買好貴，買一個嚟大家 Share 試下就夠喇～除非成個都變曬朱古力味啦～～～哈哈哈～～～～
搵食點：麥上日光（灣仔店）
搵食方向：灣仔軒尼詩道338號北海中心地下C舖
代價：折扣價$22（原價$28）
沒有留言:
張貼留言