我最鍾意同朋友一齊燒烤，因為可以慢慢食，又可以消磨時間；但有時又會怕油膩會肥……女仔就係咁矛盾。
不過，有朋友就介紹我去食呢間好特別嘅韓燒，個名叫「暴風吸入」。聽完嗰刻，呀，咩名嚟架？真係唔敢相信自己對耳，仲以為佢玩我……點知上OPENRICE 一打，就真係有呢間嘢。（都唔明點解要改個咁奇怪嘅名）
朋友話呢間韓燒嘅特色係食物唔使自己拎，落單之後，食物就會送上。之後，就會有個純正OPPA出現幫你燒嘢食，畀錢食嘢嘅客人唔使自己燒，負責食就得喇，真係啱晒我呢啲懶人。另一個賣點呢，就係少油！原來呢度同嚟燒嘢嘅鐵板有啲唔同，佢係斜嘅。換言之，即係一邊燒，啲油就會流向下傾嘅一方或蒸發咗，而唔會再附喺啲肉度。聽落又真係好符合我要求喎，好啦咁，一於就試下。
雖然最傳統的韓式燒烤只以麻油和鹽調味，不過餐廳就特別調製了5款醬汁，迎合年輕人口味。
一去到，我就梗係想知點解個名咁奇怪啦～可能餐廳都預咗香港人唔明，就將個解釋寫埋入MENU裡面！原來「暴風吸入」係韓國嘅潮語，用嚟形容啲人好似風一樣快咁食嘢……而呢樣行為，對佢哋嚟講仲係一個享受！真係好特別！入塵之後，你會發現愈來愈多客人，不過主要都係韓國人！主要係因為呢間舖係由韓國人打理，連侍應都係，所以多啲韓國人嚟都好，起碼同聲同氣先XD
晚餐始終唔prefer食咁多，所以都係點咗個2人餐，有豬有牛，滿足我同朋友仔！揀咗牛肋條同豬腩肉，再揀埋「海鮮韮菜餅」。唔想再叫肉，就點咗個海鮮，就係芝士燒鮑魚！！因為我哋對酒無咩興趣，都係飲酒算。
開始燒之前，鐵板就係咁樣，上面係空嘅，咩都無。
之後，食物陸續到齊，OPPA就會主動過嚟開始施展工夫。斜板預熱之後，OPPA做一樣做嘅，就係將唔同嘅配菜放喺四周，點解？因為一陣啲肉燒嘅過程中，就可以吸引咗嗰啲油同埋肉汁……
可以放肉未？好似未喎，呢個時候，OPPA唔係放肉落去燒，而係拎一嚿肥肉放喺板上面，一邊拖著肥肉，一邊令肥肉嘅油脂溢出，之後再放肉到上面。
OPPA首先燒嘅係牛肉，佢一邊燒，我就一邊影，反正我又唔使自己燒。我朋友就翹埋雙手喺度等食XDDD
OPPA佢將牛助條剪開之後放喺斜板上面，之後就用火槍往上面噴火加熱……型呀喂！搞掂之後，佢就將肉逐塊夾到架上，然後就燒豬腩肉。
牛肉食落「韌」咗少少，可能燒得有點過熟，不過幾有牛肉味。
豬腩肉好快都燒好咗，我就快啲嗱嗱聲試埋。
然後我就跟住佢個 MENU上面嘅指示，蘸下啲醬汁同夾下生菜食，又好似真係惹味啲。
豬肉比牛肉係滑啲，我今次將佢同埋啲韮菜一齊食，好好味。
雖然我哋唔係好多肉類，但我覺得啲配菜都好值得講。因為配菜真係意外地好食，菠蘿、南瓜、薯仔呀呢啲原來咁樣整又幾有風味。不過我最欣賞嘅就係韮菜，因為真係勁JUICY！我覺得個味道好似新疆串燒嗰種燒韮菜，所以畀我食曬XD
芝士燒飽魚，真係好正！平時食鮑魚，啖啖肉我已經食得好滿足，呢個仲要加埋芝士係上面燒，真係好邪惡！重點係食完都唔係好覺得「膩」，真係好神奇！
仲有樣未講，就係個「海鮮韮菜餅」。唔知係咪因為最後食，朋友同我都覺得好似唔係好夠味。不過，都算幾足料，有墨魚、蝦……好彩我哋無因為貪心而點芝士飯同芝士蛋卷，如果唔係應該會飽到行唔到……只係食咗上面咁多嘢，都已經覺得飽……
餐廳好大，雖然我無影到環境，但係空間感真係好夠，絕對唔會為咗做多啲生意，放多幾張檯，搞到好擠逼。通風系統亦做得好，冇咩油煙味，燒完之後，個袋同衫都唔會好臭，實在值得一讚。
韓燒嚟講，呢餐飯真係完全係「懶人餐」，我同朋友食得又飽又梳乎！多謝服務嘅 OPPA！
搵食點：暴風吸入
搵食方向：尖沙咀諾士佛臺1號8樓
