【又試新嘢】韓國吐司專門店 Tom N Toms Coffee 登陸沙田

之前喺網上睇咗篇文，介紹沙田同大圍嘅搵食好去處，我咁為食，就梗係唔會錯過啦，一早就BOOKMARK咗啲餐廳。我最想去嘅就係呢間新開嘅韓國CAFÉ專門店。之前一直想去，點知開咗幾個星期就話要閉關，好似話要內部重整……啱啱weekend就開返喇～我梗係第一時間去食啦！

　　>> 呢篇就係我睇個篇文：【香港好去處】沙田、大圍 新舊美食11個好介紹

因為我同朋友都想試下唔同嘅嘢，所以只係試咗一種吐司，另外就試咗好多人都話唔錯嘅夏威夷薄餅。你可以單點食物，亦可以配餐，餐牌內已列明價錢。我同朋友就揀咗配餐，紫薯控嘅我又點會唔揀「甘薯LATTE」丫～～朋友就揀咗「紅豆LATTE」喇！

飲品先到，嘩！勁大杯！隻杯雖然印有店名，好HARD SELL，但我覺得設計得幾靚，哈哈～有耳嘅設計，好貼心，好方便！

左起：甘薯LATTE　紅豆LATTE

甘薯LATTE～雖然唔係紫薯，但都係蕃薯類～果然，飲落去，蕃薯味都幾濃，唔太甜，味道好天然；奶泡好厚，證明真功夫！飲起嚟夠滑，聞起嚟又好香，好濃，正！

朋友杯紅豆LATTE，未飲我就已經聞到好香紅豆味。呢款LATTE平時都少見，少少甜，幾特別。喜歡紅豆嘅話都會鍾意。不過，如果同甘薯LATTE比較，我鍾意甘薯味多啲！

主角終於出場，我同朋友等咗好耐！

「蜂蜜芝士吐司」（單點 $55，配餐 $70 / $80）

蜂蜜芝士吐司

一嚟到，我哋雙眼已經發光，因為真係超吸引！呢個吐司因為有芝士，所以要趁熱食。我影完相之後，就拿拿聲食喇！吐司厚，店家好貼心，製作嘅時候就已經將佢切好一格格，食起上嚟方便得多！

蜂蜜芝士吐司 - 記得要「拉芝」 呀！ 

吐司上，有烘焗咗芝士同蜜糖嘅混合體，再灑上咗一啲碎碎嘅香葉裝飾。一切吐司，我就已經感覺到佢啲麵包係幾咁鬆軟，一切就輕易切到底了。拎一粒，嘩，「拉芝」效果即現，呢個時候，梗係要影返張相紀錄低啦！令人意想不到嘅係，2層吐司嘅中間都有芝士，絕對令唔少芝士迷瘋狂！

吐司食落外脆內軟，雖然芝士多，但卻沒有令人覺得膩，吃著，香甜嘅蜂蜜味慢慢滲出，鹹甜交集，這種味道原來也令人覺得享受。一個人吃一份似乎有點過量，卡路里也會「超標」呀，跟朋友SHARE就剛剛好喇！

另外，我哋都食咗「夏威夷薄餅」[中]（單點 $50，配餐$65 / $75）

夏威夷薄餅

講起呢個PIZZA，我最難忘嘅係，個PIZZA係即叫即整！我哋食完個吐司，休息咗一陣之後，個PIZZA先到。COFFEE SHOP 都可以做到咁，真係值得一讚！呢個PIZZA嘅材料其實好簡單，就係餅底上加咗菠蘿、火腿同埋芝士。雖然係咁，但簡單嘅嘢，往往最考工夫，出錯機會亦大。

　　　　

幸運嘅我咃梗係可以食到簡單又好味嘅PIZZA啦！菠蘿甜甜的，火腿混在芝士中，吃起來像融於一體，令人感到吃得幸福。芝士超多，我哋又可以「拉芝」！最值得說的是它的「批底」，這是我吃過最好食嘅！批底唔止脆，而且夠薄，食嘅時候啖啖餡料，但個批又唔會因為薄又承托唔到啲餡而塌倒，總之就好好味，令我一試難忘啦！

又可以「拉芝」！

之後睇返資料，原來批底係由韓國直送，用墨西哥薄餅 (Tortilla)嘅材料整嘅，唔怪知得同平時食嘅PIZZA嘅批底咁唔同啦！

今次試新嘢又成功喇，無中伏呢！呢度除咗食吐司、PIZZA之外，MENU上面話仲有捲餅（PRETZELS），不過要遲啲先有得食～～等佢有得食嘅時候，我又再去食先！

搵食點：Tom N Toms Coffee

搵食方向：沙田新城市廣場一期1樓158號舖

代價：$155