前幾日凍到癲，於是就同朋友去咗食好嘢～據講長沙灣嘅本店一直大排長龍，想 walk in 食到，諗下好喇。受歡迎程度可想而知。不過，喺啱啱去年年尾，就開多咗太子分店，先可以令人龍縮短。天氣凍，應該無咩人好似我們咁傻出街食風吧？好嘢，排咗一陣就入到喇！
我們今次係去太子嘅新分店，地方寬敞，好少食雞煲嘅地方咁有空間感。通常食肆都會為咗做多啲生意，啲檯擺得密密麻麻，檯又細……但呢度就唔係喎～每張檯同檯之間嘅距離夠寬，方便人之餘，侍應上菜，收拾都輕鬆好多，唔使「就住就住」！
我們選了：
- 黃金芝士雞煲（小）
- 鮮炸響鈴
- 哈哈蝦中寶
- 手打五寶丸拼盤（墨丸、蝦丸、豬肉丸、牛丸及鯪魚丸）
- 鮮製四拼餃（鳳城水餃、鮮牛肉餃、鮮蝦雲吞及韮菜餃）
- 新鮮牛頸脊
- 竹蔗茅根
芝士雞煲係主菜，即使其他火鍋料嚟咗，我們都未可以開動。不過，過咗幾分鐘之後，香噴噴極邪惡嘅芝士雞煲終於上檯出場喇！
嘩～未食都覺得好「芝」味啊～我終於明白點解啲人會咁鍾意芝士。因為，望住啲半溶芝士，就算未食，只係聞到陣味，都已經令人不斷「吞口水」，想「食」緋緋。XDD
芝士雞除咗有雞之外，仲用咗芝士醬同芝士碎製成，稠身，味亦香濃。上面亦舖上紫洋蔥，最後當洋蔥吸收咗芝士嘅精華之後食，一定好正。
雞煲一煮滾，我哋就將火候調細。一打開蓋，芝味四散撲鼻而來！你睇下～～一夾上嚟……拉芝呀～～～真係呃咗人唔少菲林。好彩今時今日影相唔係用菲林唧，如果唔係，凈係影呢個煲都無曬菲林嚕。
每一件雞都被芝士汁包住，吸收咗芝士嘅精華，入口香滑，芝香無比。因為我咃其中有個芝士控，所以好快就將啲雞清咗。於是，侍應就幫我哋加湯，打邊爐喇！要咩湯？識加梗係加芝士湯啦，咁樣先唔會沖淡芝士味嘛～
食完啲雞，店員就會加芝士湯並唔係加水，咁就可以KEEP住芝士既香味, 可以打邊爐喇。
識食梗係要叫響鈴啦～一放落去，數3聲，即刻挾返上嚟食～正呀！脆脆哋，吸咗啲芝士湯，爽口又稔稔哋。另外一個就試下浸耐啲，等佢吸收多啲芝士嘅精華。嘩，芝士味濃咗好多，不過就真係有啲「膩」。
牛肉都有好多種，所以我哋就揀咗平時比較少機會食到嘅「牛頸脊」。睇到個樣，就算我唔識咩叫靚牛，都覺得啲碟牛肉啲紋勁靚，應該會好好味。
原來呢個部位喺牛頸至牛肩中間，多活動（轉身，擰頭？），所以肉質會比較結實，口感出眾啲。放入煲內無幾耐就熟，牛味十足～
另外我欣賞嘅係哈哈蝦中寶，因為真係好少有。呢種蝦丸唔只有真蝦肉，而係有大大隻全隻鮮蝦，仲有埋蟹籽。
朋友好想食啲蟹籽，但又怕生；放入水滾，就自然會沉底無曬T^T熟咗嘅蝦中寶超彈牙，比平時食嘅蝦丸好味好多。值得讚嘅係，蝦超爽，嚼勁十足～呢隻蝦中寶真係食到人哈哈咁笑。
之後出場嘅係手打五寶丸拼盤：包括墨丸、蝦丸、豬肉丸、牛丸及鯪魚丸，全部都係自家手打。食完蝦中寶，呢粒蝦丸就自然失色啲，似乎無咩特別。墨魚丸夠彈牙，中間有墨魚粒～鯪魚丸比較少見，但都唔錯。豬肉丸同牛肉丸，我同朋友都覺得鹹咗啲，可能咁啱多落咗鹽。
我哋無空間食烏冬同出前一丁，呢啲餃就係我哋嘅主食——鮮製四拼餃（鳳城水餃、鮮牛肉餃、鮮蝦雲吞及韮菜餃）。可能因為之前食嗰啲配料都比較出眾，相對嚟講，我哋都覺得啲餃子比較遜色。
除咗鮮蝦雲吞之外，我哋覺得其他幾種餃嘅分別唔大，而且同芝士唔多夾，我哋只係食到唔同嘅鹹味，但就唔太容易分辨出唔同嘅餡；不過，都有可能係因為我哋食得太飽嘅關係，懶於去分辨啲味XDDD
如果有時光機可以去返當日，我會犧牲啲餃，轉而叫烏冬或者出前一丁，哈哈。
除咗鮮蝦雲吞之外，我哋覺得其他幾種餃嘅分別唔大，而且同芝士唔多夾，我哋只係食到唔同嘅鹹味，但就唔太容易分辨出唔同嘅餡；不過，都有可能係因為我哋食得太飽嘅關係，懶於去分辨啲味XDDD
如果有時光機可以去返當日，我會犧牲啲餃，轉而叫烏冬或者出前一丁，哈哈。
食咗咁多嘢食，有啲口渴，唔想飲汽水，就叫咗一jar竹蔗茅根。嘩！我哋幾個都好鍾意飲，因為真係好清甜，好好飲。一飲就飲咗2大杯！飲完之後，成個人好似醒咗咁。味道甜甜地，但又唔會過甜。雖然係喺雪櫃拎出嚟，但係唔會太冰凍，真係啱啱好。我仲食埋個馬蹄呢。
其實上面叫個啲仲未滿足到我，因為有其他嘢我都想試～不過我哋得3個人，叫咗上面個啲都食唔曬，飽到上心口，所以根本無機會食到芝士湯出前一丁或者烏冬個啲，唯有下次再食。不過，今次食得好滿足，咁凍嘅天氣去食，真係一流呀～食完真係成個人暖曬！
搵食點：米走雞
搵食方向：太子彌敦道761號太子藍馬之城2樓
代價：約 $150 - 200/人
沒有留言:
張貼留言