今日約咗朋友，因為佢話畀手信我。我哋揀去旺角食。點解泰國嘢係家鄉菜？唔好以為我朋友係泰國人，佢係百分百香港人，但就唔知點解成人都被人覺得佢似泰國人……（其實，泰國人係點？）
當日係平日，去到已經８點，但估唔到都係要等位。唔通真係好好味？喺外面等位嘅時候，聞到超香嘅串燒味，真係引死人，令人流曬口水。我同朋友都話一定要試！
除咗串燒係必食之外，朋友想食新鮮的生蝦，但係落咗單之後，店員就同我哋講，今日生蝦無貨，朋友雖然失望，但好彩無激到生蝦咁跳（搞咗個爛gag，唔好意思）。既然最貴嘅嘢食無得食，咁一於豪畀佢，叫嘢飲啦！
串燒方面，我哋叫咗豬肉、雞肉同和牛，頭兩樣預咗比牛肉平，但個牛肉係咪真係好得先？
豬肉串燒($12)、雞肉串燒($12)、和牛串燒($20)
 |
| 雞肉及豬肉 |
豬肉同雞肉串燒都搽咗沙嗲醬，餐廳應該自己加工過，因為同平時就咁買返嚟嘅唔同味。呢個醬有陣陣花生香味之外，食落又帶啲甜味，辣味又啱啱好，好惹味。不過我哋都覺得雞肉比豬肉嘅口感好，因為豬肉乾咗啲，有啲韌，雞肉滑啲。
食完豬肉同雞肉串燒之後，我哋就食和牛串燒喇。和牛串燒唔係真係全部都係牛肉，中間有青椒同埋洋蔥相間住。你有無發現和牛串燒嘅汁同頭先嘅唔同顏色？頭先係沙嗲醬，但呢個唔係，佢係有啲酸酸甜甜，但又辣辣地咁，好特別。和牛的確幾厚肉，幾大粒，而且有牛味，又真係抵佢賣貴啲嘅。
炸物拼盤就有炸蝦餅、魚餅同春卷。三樣之中，我最鍾意蝦餅，因為好爽口彈牙，又唔會有好多其他肉，食到嘅都係蝦肉。魚餅同我想像中嘅有出入，而春卷就似乎油太多，炸得過火，看起來有點黑。不過，值得讚嘅係隨碟奉上泰式辣醬，令人食得滋味又興奮！
青咖喱海鮮就係我哋嘅主菜，海鮮有魷魚、蠔同埋蝦，都算豐富。青咖喱最初食唔係覺得好辣，但點知慢慢就愈食愈辣，不過感覺好過癮，配白飯食就無得頂，堅正！
至於飲料呢，我就飲椰青，朋友就飲椰汁冰（唔記得咗影）。椰青幾清甜，我最鍾意。最後食埋個甜品——泰式椰汁糕！雖然個樣同我想像嘅（用荷葉包住）有啲落差，不過味道都叫OK啦。我以為係紅豆椰汁糕個種味，點知係加咗西米嘅，咪當試新嘢囉～
旺角食泰國嘢，唔趕人，又唔使加一，呢度都算幾好。我見到隔離檯食魚，仲食得好滋味，等我下次試試先！
搵食點：泰廚泰國菜館
搵食方向：旺角通菜街126號地下
代價：$283（免加一）
沒有留言:
張貼留言