【Stella's Bar & Restaurant】荃灣平嘆法國菜

同朋友行去  AEON，就去荃灣廣場  shopping！行到咁上下，就上網睇下附近有咩新餐廳未試過。點知一睇除了荃灣廣場內嘅餐廳，就見到呢間。

環境唔錯呢！

見啲食評都講得唔錯，又話係法國菜喎，價錢都接受到，就同朋友入去試下，我當 FINE DINNING 架喇～

 叫咗個藜麥沙律，藜麥係最近大熱，又有超級食物之稱，我哋決定叫嚟試下，扮下識食。其實食落係有啲唔慣，因為一粒粒，口感比米粗糙；不過好彩有其他沙律菜同生果，所以都好容易食曬成碟。藜麥纖維高，好有益，所以我哋點都會食曬佢。

侍應送來一籃子餐包，沾醋食。

餐湯可以加或者唔加，我哋加咗。今日係南瓜湯。

睇返之前嘅食評，好似無咩人 POST過南瓜湯！我好少飲呢個湯，多數飲忌廉湯，但原來呢個湯幾好飲。好香嘅南瓜味，又creamy！

主菜係是日精選鮮魚同埋松露意大利飯。

是日鮮魚係盲曹魚，餐廳用咗煎封嘅方法，令條魚食起上嚟無咩腥味；魚肉入口嫩滑，完全唔嚡口，魚皮煎得香脆，好味！

松露意大利飯睇落好簡單，但其實松露味極香濃，未食就已經傳嚟陣陣香味，令人垂涎。正宗嘅意大利飯是有D硬，唔會好軟身。

呢個意大利飯嘅汁同飯融合一齊，不過飯嘅口感唔會太軟糯，煮得不錯呢！

值得一讚嘅是呢度嘅沙冰飲品！每次點乳酪飲品，其實都擔心會有「藥水味」。而呢度嘅乳酪沙冰就無令我們有依種感覺，飲起上嚟，味道又幾清新，有酸酸嘅士多啤梨味，亦都有香甜芒果味！貨很對版，哈哈！

 

甜品揀咗好多人都食嘅伯爵紅茶意式奶凍，另一個就揀咗店員推介嘅焦糖香蕉甘納許。

前者幾特別，好似食緊奶茶味嘅布甸，幾特別；

而另一個就有啲花神嘢。食之前，店員就用火槍喺上面燒一燒，令「焦糖」出現！香蕉下面，其實係朱古力同忌廉打成嘅  mixture。香蕉配朱古力，係好多人心中嘅夢幻配搭！頭幾啖我都覺得幾吸引，不過食食下我就覺得有啲苦澀，可能我個人唔係好食黑朱古力嘅原因啦～不過睇得出呢個甜品好特別，好有心思！

雖然埋單  OVER 曬原本個  budget，不過原因主要因為我哋2個太貪心，愈叫愈多唧。不過呢度都叫幾好  hea，去開荃廣同  AEON可以試下！

搵食點：Stella's Bar & Restaurant
搵食方向：荃灣大壩街5-7號仁蕙苑地下3-4號舖