【大發現】尖沙咀樓上餐館 抵食粵滬小菜

之前唔記得為咩事去咗尖沙咀，即興就打畀朋友一齊食飯。平時要約成個月，今次即興約竟然搞掂。尖沙咀食嘢，坐得舒服啲，都係大商場裡面，價錢又唔平。行行下，有個阿姐派傳單話搭 LIFT上10樓食就得，我先發現原來廣東道係有食肆（除咗平時見到大招牌嗰啲）。傳張上見到有唔少熟悉嘅廣東菜菜名，又有我喜歡嘅炸豬扒菜飯同雞絲粉皮，一間餐廳竟然可以同時食到粵菜同上海嘢食，真係少有，就係咁，我就被吸引咗。

上到去，無咩人，一眼見曬，仲有另外2檯人！老闆娘見到有人光顧就特別熱情，又問幾多位，推介要食啲咩，又問點解會識上去……等埋朋友之後，我哋就拍板叫餸。

朋友話係 Openrice 見唔到地址，問我點解揀呢間。其實我都係因為收到餐廳職員的傳單唧。不過 Openrice 未有資料都唔出奇，因為唔會有個平台係咩都知。新餐廳開咗，一係靠店主自己通知 Openrice（咁自然要收錢啦！），一係就係食客報料，再經 Openrice 核實（我報過幾次料，所以就知。不過我估報料之後，Openrice 核實嗰時都會問下有關餐廳要唔要個版面，要的話又係要畀錢……）所以，香港地可能仲有好多你同我都未發掘到的隱世小店。

黃金大蝦 ($108)

黃金蝦嚟講，啲蝦都算大隻喎。沾了鹹蛋黃汁的外殼炸得酥脆香口，蝦肉亦入味爽口，令人吃得津津有味。

鹽擦雞半隻 ($118)

不知道甚麼是鹽擦雞，不過這是招牌菜，看到鄰桌亦在吃，便來半隻試試吧。原來這跟白切雞相似，但鹽擦雞比白切雞更多汁，想是用上湯浸過吧。

雞肉嫩滑有嚼勁，雞胸肉也不「霉」，味道恰好。雖然伴有醬汁，不過我就無蘸上了。

麻醬三絲粉皮 ($34)

粉皮呀，我成日都好想食粉皮，因為喜歡個口感，滑又爽。要食的話，一般都要去食上海菜嘅菜館先有，所以真係好少食。每塊粉皮都切得好大片，唔會細塊又碎，食起嚟特別痛快！呢度用嘅醬幾特別，係用麻醬（似担担麵個花生醬味），唔會好重口味。

五香牛展湯麵 ($50)

呢個牛展麵個樣令人諗起台灣牛肉麵。牛展炆得好香，未食都聞到香料味。牛展切得薄，可見刀功不凡。稔身入味但唔硬，真不錯。麵係上海麵，有韌性。

紫菜湯雲吞 ($46)

這個雲吞特別在於配上紫菜湯，坊間少見。雲吞並不是廣東的那種雲吞，而是像餃子的那種，皮比廣東雲吞的皮厚，不過餡一樣多。

菠蘿咕嚕肉 ($72)及菜飯 ($15@)

因為有幾個人，我就無點豬扒菜飯；但食咩配菜飯呢？朋友就話想食咕嚕肉。呢個咕嚕肉有菠蘿，好開心呀！咕嚕肉酸酸甜甜，肉質軟稔而口感，餸飯一流呀！

菜飯有啲濕，唔同快餐店好乾身，同白飯無異，只有幾粒菜個種。食落唔係只有鹹味，應該真係用上湯去煮，之後再加埋啲菜落去，呢啲先係真菜飯呀！

溏心蛋 ($10@)

我唔鍾意食流心蛋，生蛋，溫泉蛋呢類生蛋黃嘅食物，平時都唔食溏心蛋。但今次我哋有4人，點咗2隻，朋友就叫我試下。見佢哋食得咁滋味，隻多個樣又勁吸引，我就試下啦。咬一口，嗯，啲蛋白一啲都唔生，味道又幾好，好，我繼續食。食到中間蛋黃嘅部分，我發現個蛋黃都唔係完全生，個程度應該係95%啦～其實都幾好味～

食飯期間，就同老闆娘傾下。原來呢度午市好多客人，因為附近好多人返工，加上食物價錢水平合理，一個午市都做3、4轉，反而夜晚啲人放工就無乜人，所以我哋去到都係得1至2檯客。

你可能會話，整咗 Openrice，多 D人知，可能會好啲？老闆娘話當然有想過，不過佢唔可以保證咁樣可以幫到晚市，如果啲人午市嚟，反而無用（因為宜家午市已經飽和咗）。唉，做生意真係艱難喇！呢間小菜館啲嘢食好過連鎖店多多聲，又多選擇，真係唔想因為咁而無咗～

臨走之前，老闆娘話同廚師研究緊天氣凍啲嗰陣就供應「一人一鍋」打邊爐套餐，仲話叫我遲啲去試～有機會都會去試下嘅，至少水準一定好過阿樂同阿活啦～XD

搵食點：珍味煌小廚

搵食方向：尖沙咀廣東道82-84號流尚店10樓　（呢個都要記低喇！）
電話：2348 1008 / 9139 0226 　（呢個都要記低喇！）
＊提供免費wifi～