【又試新嘢】滋味啖啖頭大頭蝦 令人一再回味

雞煲嚟到香港之後，大受歡迎，唔少食肆都在天氣凍時供應雞煲。幾個月前，一家以蝦煲為主的餐廳落戶太子，食過嘅人都讚。餐廳位置唔算旺，附近店舖客人都唔多。不過，我發現到訪當日，即使是11月頭的星期一晚上，也有唔少客人專程去食。看來，除了雞煲，今次蝦煲有看頭了！

蝦煲是用大頭蝦，在店外已經看到餐廳的魚缸內的生猛大頭蝦，據說大頭蝦難養，只能活一兩日，所以需要每日入貨。要好味，更加要即劏即煮，客人下單後才撈起，夠曬新鮮好味！

雖然餐廳為了迎合香港人口味，推出香港地區限定的避風塘蝦及鹹蛋黃蝦，不過我們都覺得要嘗原始的寶島味道，所以堅持選了「胡椒蝦」。另外亦點了其他小菜，如一口炸豆腐、黑白卷、樹子冰菜和菠蘿雪葩作甜品。

胡椒蝦  $188

一上檯，未開蓋，已經聞到好濃胡椒味。一開蓋，胡椒味勁「攻」鼻，賣相都十級靚同吸引，真的沒想過吃蝦都能有這種驚喜。

原煲上檯的胡椒蝦有8大隻，每一隻都差不多有手掌咁大，一睇就知啖啖肉。一拎起，胡椒味勁香，蝦殼都已經好搶味，正！摵開殼，見到勁多蝦膏，蝦肉實正，食落爽口彈牙又鮮甜多汁，係我食嘅最惹味嘅大頭蝦。

今次第一次食胡椒蝦，食完之後真係發現原來胡椒味同蝦原來好夾！男朋友見到啲相，就責怪我唔帶佢去食……哈哈，真係好正，下次要帶佢去食！

值得一讚嘅係，餐廳有挑走條蝦腸架！真係好細心！我留意到煲底有好多胡椒粒同蒜片，唔怪得咁香咁惹味啦！

脆炸黑白卷 $98

原來黑白卷係指腐竹包捲住「墨汁墨魚滑」同「墨魚滑」。我同朋友都覺得好好食，外皮炸得香脆，但唔油，正！兩種卷都很足料，裡面有很多墨魚粒，爽口鮮甜。而兩者相比之下有咩分別？

黑卷加咗墨魚汁，濃味一啲；而白卷就只係墨魚肉，所以食起嚟鮮甜味突出啲！兩者都各有突出之處，難分高下！

一口炸豆腐 $68 

見到呢個炸豆腐有隻手指，就點嚟試下。雖然係炸，但竟然一啲都唔覺油膩。

食落香脆可口，口感就有啲特別，唔同平時豆腐咁軟滑，而係帶煙韌感，食魚腐嘅口感，不過係炸。

不得不提嘅係，豆腐有豆味，蘸埋附上嘅海鮮醬食，好開胃，我愈食愈多。

樹子冰菜　 $98

「樹子」跟「冰菜」，其實這兩樣我也不認識，還是第一次點一樣自己都唔知係咩嘅菜，當是挑戰囉。

冰菜是本地較罕見的蔬菜，樣子也夠特別，像有一顆顆冰點在上面似的。口感爽脆，質感滑滑的；樹子就像梅子一樣，吃一顆，原來是酸的。

店員看著我們疑惑的樣子，就來解釋說這菜很健康，冰菜可降三高，而樹子則纖維高，很有益。不知道她說的對不對，不過樹子酸，能開胃就是絕對的。

菠蘿雪葩 $68

最後甜品就來了個菠蘿雪葩。

我們看到雪葩的樣子，都相對而笑：這麼硬這麼多，怎樣吃……哈哈！

吃著的同時，我們都覺得這個鐵匙很可愛，是菊花？向日葵？要是每次都是用它來吃雪糕，一定吃得很開心。菠蘿雪葩雖然很硬，不過都能吃。味道真的像吃新鮮菠蘿一樣，清甜多汁，而且夠冰凍，吃完透心涼。然而，我們用餐當天已經開始轉涼……哈哈。

這家餐廳的食物真不錯，店員服務也好。我們沒點飲品，她也多次主動給我們斟水，換碟。我會再來的！甜中帶點微酸, 慢慢刮刮下咁食, 非常解渴又解暑。

搵食點：蝦棧
搵食方向：太子花園街233-235號偉雄大廈地下A舖