【小店大搜索】灣仔小巷悠閒一角嘆all day Brunch

上星期其中一個 Weekday 放假，就晏啲食嘢，下午茶時間先食Lunch～

睇過網上介紹，好多食物都好clean同好健康咁，牛油果同三文魚，再加上雞蛋，呢啲組合係高營養嘅無敵組合！

Smoked Salmon Risotto $113
賣相超吸引，一睇就已經覺得三文魚好新鮮。意大利飯煮得唔錯，粒粒分明，食落係傳統嘅口感，唔係完全煮到腍個種，好正宗呢～

值得一提嘅係，飯粒被cream cheese 包裹住，有淡淡嘅芝士味，中間添加咗翠玉瓜，增加口感之餘，亦可減膩；而煙三文魚表面加咗ricotta cheese，完全畫龍點睛，清新又好味。

Avocado Deluxe Crepe $93
食物嚟到之後先發現我哋點嘅2樣嘢食原來係差唔多，都係牛油果同三文魚。

呢個就係用Crepe薄餅包捲住牛油果同三文魚，牛油果大大嚿，一啖食到幾粒，大滿足；三文魚好新鮮，平時唔食魚生嘅我都覺得ok，唔抗拒～Crepe入面亦包捲埋生菜，整體感覺好清新～唯獨 Crepe 皮有啲厚，可改善。

 

Ruby Love $46
呢杯嘢賣相好正，吸引眼球～除咗色彩鮮艷，上面3塊果乾亦點綴得好相襯～飲起嚟，甜甜酸酸咁，如果可以再少啲冰就好喇～

Chai latte (regular) $42
唔係普通嘅Latte，而係泰茶Latte，所以未飲之前已經聞到好濃嘅泰式奶茶，獨有嘅香料香味。除此之外，飲落口感滑而醇厚，奶味剛好但不會蓋過茶味，齒頰留香～

搵食點：Mansons Lot
搵食方向：灣仔汕頭街1-3號地下