你無睇錯，我都打錯，前幾日我就係食咗一個愈食愈暖嘅雪糕！講緊嘅就係呢個 Hand
Warmer Sweet Potato！
呢間雪糕店上年開張，以創意雪糕為賣點，啲雪糕連張招紙都食得，超環保，一啲都唔嘥嘢。而趁住天氣凍凍地，佢哋就推出咗呢個食住暖嘅雪糕，啱曬我呢啲天氣愈凍愈鍾意食雪糕嘅人！加上我係個蕃薯控，又點會錯過呢？
期待咗好耐，我今次終於可以去食喇！
店舖外墻裝潢好少女，粉紅與 tiffany blue 嘅外墻，已經吸引咗唔少注意。
入到店內，感覺好舒服，好warm。事關一入去，就見到個番薯hand warmer嘅特寫！快啲拿拿聲落order先！
等嘅期間，我看到右手邊放置了玻璃器皿，裡面盛載著的一定是加在雪糕上的不同配料呢。
好快，大過我隻手嘅雪糕就嚟到我手上喇！雪糕嘅設計極具心思：雪糕手握住嘅位置其實是蕃薯。店家將日本甜薯烘熟後，切開並將中間的蕃薯肉挖走，然後往內放入雪糕筒，在邊緣淋上朱古力漿和放一粒粒的棉花糖，最後就唧入榛子味雪糕，撒上脆片。
影夠相，事不宜遲，快啲食。先食雪糕同脆片，呢個組合簡直完美，就好似係食緊輕怡版嘅金莎，甜度啱啱好，而且令人愈食愈上癮。棉花糖細細粒，得意之餘，口感軟綿綿，正！同朱古力醬一齊食，味覺大滿足。覺得凍凍地？即刻咬返啖暖笠笠嘅蕃薯就perfect！
蕃薯嘅表面搽咗啲糖漿，之後經過高溫烤焗，即係「煨蕃薯」哦！一邊咬蕃薯，食雪糕，一冷一熱，冰水交融嘅感覺，真係令人好感動，停唔到口！雪糕食完，剩低嘅蕃薯可以食住嚟取暖，仲點會怕凍呢？邊個話冬天唔可以食雪糕架，食呢個蕃薯hand warmer就唔使驚～
溫馨提示：朋友同我都覺得呢個雪糕份量巨大，如果你唔係打算當飯食，就2個人happy share喇！
搵食點：Loooop
搵食方向：大坑浣紗街2A地下
代價：$48
沒有留言:
張貼留言