一直都有留意網上推介美食，香口嘢好多人都鍾意，我都唔例外。聽人講，西環有間小食店嘅鹽酥雞翼勁好食，風靡咗唔止附近街坊，仲有其他區嘅人。講得咁吸引，我就梗係要嚟親自試下。
舖名叫「魚蛋媽媽」，但風頭一時無兩嘅就唔係魚蛋，而係鹽酥雞翼。呢個真係一個謎，等我去拆解下係咪真係咁好味。
首先我係打電話預留嘅，因為我唔想食唔到。去到之後，同老闆娘交代咗之後，佢就幫我炸。佢話因為仲有貨，所以等我去到先炸，咁樣新鮮啲，好味啲。真係貼心！
等了約１０分鐘，老闆娘將炸好的雞翼放入紙袋，後來見我「相機食先」，又咁多隻，於是二話不說，就幫我轉咗用碗放，仲叫我慢慢影。（今時今日，去邊仲有呢種服務態度先？呢啲咪叫人情味囉！）
一邊影，一邊望住啲雞翼，已經好想食。啲雞翼睇上去同平時嘅炸雞翼無咩分別，但原來係「單骨」架！食起上嚟，勁方便！咁樣我就唔使驚整到對手好油，但又可以好快咁食完啲雞翼。呢個製法真係好正！
雞翼未食已經聞到好香，應該用咗唔少香料。咬落去，外皮酥脆但一啲都唔覺得油膩，肉夠入味，唔係得個鹹或辣，食得出用咗唔同嘅材料去醃，好惹味；肉超嫩滑，我簡直食到停唔到口，所以中間無再影相。我食完一隻又一隻，８隻好快就無曬。
除咗雞翼，仲有賣其他嘢食：撈麵、魚蛋、燒賣、厚多士、腸粉……另外，飲料都幾有特色，得到唔少街坊撐場，好似檸檬薏米水……
店舖逢星期3休息，其他日子有嘢做都會預先喺 Facebook 講定，所以大家出發之前，可以留意埋 Facebook 嘅公告。如果放咗工之後去，驚太夜去到之後賣曬嘅話，可以預先打個電話去落定單或者睇下仲有無雞翼（因為真係太好味，超搶手！）。
搵食點：魚蛋媽媽
搵食方向：西環石塘咀德輔道西343號均益大廈二期地下46A號舗
代價：$20 / 8隻
沒有留言:
張貼留言