今次介紹嘅五層流心芝士軟包超受歡迎，應該唔少人都食過，仲post上網做分享。皆因呢個包每日限賣500個，每次出爐得15個，半小時出一次爐……每人最多可買6個……最初係賣$20一個，$70就有4個。不過，我就無咁好彩，未加價個時就買唔到，加咗價（$25）之後，我就買到了！每個相差$5，真係好唔開心囉。
購買當日，都預咗要排，好彩前面唔係好多人，等一輪都會買到。唔講咁多，快啲試下先！
你睇下，佢真係好多芝士！佢出咗爐之後，再遂個搽返啲芝士醬同芝士粉喺個面度，所以真係好足料。據講係用咗「流心芝士醬混合巴馬臣芝士粉、忌廉芝士及新西蘭軟芝士製作……」（唔知有無漏），呢個應該好味掛？
雖然睇落去，賣相不是超靚，但食落個味道真係幾好，只係個包唔夠軟身。我特登切開佢，原來佢中間有兩層係有兩種忌廉芝士。外面個啲其實係奶粉，唔怪知得我覺得有奶味。
本來我以為食完會覺得好膩，但竟然絛。唔知點解，食食下，我覺得佢甜甜哋，感覺有啲似食緊平時有條坑個種忌廉奶油包，唔太似芝士。唔通就係因為咁，所以唔覺得「漏」？
網上有人話，可以試下常溫以下嘅食法，好似加熱，或者雪凍。我兩種都試過，加熱之後，完全唔好食，唔夾；雪凍佢呢？面層硬硬地，係有啲似雪糕，不過咬到個包就後悔了，因為搞到個包好乾，好硬。
未食過嘅話，可以買個試下，畢竟真係未見過類似嘅包，加上都幾好味。試過嘅我，就唔會再買喇，因為真係好貴囉lol
搵食點：麥上日光
搵食方向：尖沙咀金馬倫道32-34號福僑大廈地下D鋪
代價：$25/個，$90/4個
沒有留言:
張貼留言