之前食過M記出品嘅紫薯雪糕，水準真係唔差，不過估唔到，食咗一次，想再食嘅時候，雪糕雖然都係紫色，不過味道就由紫薯變咗紫芋……
前幾日收到風，知道原來仲有一個地方有紫薯新地食，就係全港唯一一間嘅Ｍ記概念店。咁好彩，我日日返工都經……哈哈，仲唔係註定要我試食？！
呢個絕對唔係一般紫薯新地咁簡單，而係「紅豆紫薯新地配比利時窩夫」。（呀，個名長到咁……簡稱「紅豆紫薯新地窩夫」啦！）見到張相，覺得好吸引。因為唔止有紫薯雪糕，仲有我鍾意嘅紅豆，所以我好想試！
去到櫃檯，我先知道原來呢個嘢要$38（呀，咁貴……），有啲猶豫，但最後都係買咗。
賣相方面，都算符合參考圖片嘅，冇咩出入……只係啲紅豆同個窩夫無圖片影得咁靚囉。
味道方面，先食紫薯雪糕。咦，點解咁甜嘅？好似比之前食嘅紫薯味雪糕甜咗？試多幾啖，都係一個字——「甜」。我嘗試仔細咁搵下久違嘅紫薯味，但SORRY，我真係食唔出有紫薯味！T^T
紅豆我都鍾意食架，紫薯雪糕唔得，我都希望紅豆好味，紅豆，難食極都有個譜？睇見佢每粒都幾飽滿，又大粒，應該唔錯。一食，又出事！搞乜咁甜架……仲甜過個雪糕……叫人點食……
最後，我只好將所有期望都放喺原本最冇期望嘅窩夫上面。呢種係比利時窩夫，同平時個啲唔同，呢個無咁厚，中間薄啲。外皮可能因為淋咗紅豆醬喺上面，所以唔脆。不過，係連無醬嗰啲部分都唔脆……好失望！
呢次我嗰「三十八蚊」真係「完了吧，如無意外……」
性價比好低……即使拆開３樣嘢嚟睇，每樣十幾蚊，我都完全睇唔出有邊一部分係物有所值……完全係「伏」!
令我更加不滿嘅係，某間雜誌係咁樣寫「冰火兩重天，凍冰冰嘅紫薯新地雪糕，加上即焗窩夫以及熱辣辣紅豆醬。一個字，正！」（我肯定佢無食過，我諗大家都預咗嘅……係我傻唧=[）
不過，每個人嘅容忍度同口味都唔同，我絕對唔會阻止你去試，仲會好鼓勵你去試，試完可以同我交流下，睇下係口味問題，定係產品問題。我唔知賣到幾時，因為佢話「期間限定」……想試想食就快手啦！
搵食點：全港唯一．麥當奴概念店
搵食方向：金鐘海富中心地下麥當勞
代價：$38
沒有留言:
張貼留言