上次試過「西班牙海鮮飯味」，已經同大家預告過會試埋「西班牙辣肉腸薄餅味」。
終於有得賣喇，前幾日都幫大家率先試咗味喇！係咪好想知，到底好唔好味呢？快啲睇報告喇！
呢包西班牙辣肉腸薄餅味薯片，同西班牙海鮮飯味最大嘅分別，一定係個外形，今次呢包嘅薯片係波浪紋，有人覺得食落去，較有口感。
打開包薯片，傳嚟一股辣味，同時又帶有一股煙燻香氣……真係令人懷念西班牙烤肉腸嘅味道。真係忍唔住喇，二姐夫今次竟然率先搶閘食第一！
薯片食落有香濃芝士味，因為薯片上有半溶芝士粒，真係好足料！慢慢細味，真係食到肉腸味，仲有啲煙肉味，好正呀！雖然唔係好辣，但係辣味同肉腸加芝士夾起嚟，好惹味～加上波浪切紋，更加令人食到停唔到口！
雖然我未真正食過「西班牙辣肉腸薄餅」，不過，呢包薯片嘅辣肉腸咁出，加埋上面啲芝士應該就係「西班牙辣肉腸薄餅」嘅味道喇～通常 PIZZA 都係多咗啲包同芝士嘛 XDDD 應該係咁～～～
咁到底邊個味好味啲呢？今次大比數認為呢包「西班牙辣肉腸薄餅味」好味啲！因為味道多層次，夠惹味，而且口感都特別！而我個人就更加欣賞，佢能夠喺未食之前嘅已經用香味吸引到我呢一點！^^
【重溫】卡樂B西班牙海鮮飯味薯片試味報告
搵食點：各大超級市場及便利店
代價：$10.9（部分店舖做緊特價，買2包有平）
沒有留言:
張貼留言