【又試新嘢】期間限定！卡樂B 西班牙海鮮飯味薯片

自從身邊朋友知道我開咗個Page，定時需要新題材，不時都會發啲新產品畀我，問我會唔會試，寫報告呀咁。加上自己都鍾意試新嘢，所以每次介紹新嘢都會好興奮。

今次，就等我介紹返呢包新出嘅卡樂B薯片啦！

我平時都鍾意食意大利飯架，不過飯味嘅薯片呢，就始終有啲保留。唔講咁多，快啲試味。

試食成員一定有我可愛嘅家庭成員啦，包括弟弟、二家姐同姐夫和雙親。一打開包薯片，嘩，超香！好多陣香料味呀，真係幾有海鮮飯嘅香味喎！真係引死人喎，嗱嗱林食返塊先。

薯片食落甜甜地，不過辣味就出嚟！食食下，喂，又真係有蝦味喎～加埋啲西班牙香料陣味嘅刺激，真係令人愈來愈上癮，辣味有層次！仲爽過食燒烤味薯片，因為海鮮嘅味好正！

薯片同平時一樣，薄又脆，真係色香味俱全。連我家極嘴刁，本身話唔食嘅老豆都忍唔住拎返幾塊嚟試下XDD呵呵！家姐仲話「比蝦片更有蝦味」*V*

不過呢，正如阿媽話齋，好味就好味，不過就唔多似「西班牙海鮮飯」味，因為完全係無「飯」味，但就好有海鮮味。

可能大家太鍾意食，食食下，老豆問：「無曬喇！？」即係點？快啲去買啦！^^”

好似仲有一款新口味？做乜唔試埋？問得呢個問題，就知你幾為食啦！另一種味係「西班牙辣肉腸薄餅味」，據講係波浪形薯片，而且有芝士粒架……係咪諗起都想食呢？我好期待哦！

不過，3月頭先上市，可能今個星期日會有得賣，等多幾日啦！

搵食點：各大超級市場和便利店

代價：$11.9（唔太記得=P）