【又試新嘢】美國Zenify減壓無糖綠茶飲品

最近瞓得好差，每日都唔願起身，個人瞓完都好似無瞓過咁，人都躁啲。有日行商場，見到有間零食店賣呢枝減壓飲品，美國出嘅。

話就話無糖，但有機會係用代糖。我就睇埋營養標籤，除咗10個卡路里之外，又真係咩都無喎。為咗瞓好啲，我就買罐試下，都係$10唧！

倒出嚟，真係綠茶嘅顏色，但就有啲汽泡……

呢啲其實係「汽」！因為佢係用有氣水去整，之後加茶氨酸。飲落有少少甜味，但唔係好甜，亦唔會糖水嗰種甜，之後發現原來係羅漢果嘅甜味。我唔係好知有咩其他飲料係呢種味，但唔難飲。不過我飲咗好耐，因為有「氣」！我後來記得，店主介紹個時話，味道係似有氣嘅寶礦力～～

味道都係其次，不過我覺得個晚瞓覺好似無發夢，第二朝起身好似無咁攰，有精咗少少咁，唔知關唔關事，因為我都早瞓咗XDD

$10一罐，比喺citysuper買抵好多！至少喺呢度買，你會知道自己買咗枝乜返屋企飲！呢間零食店仲有其他好特別嘅進口零食，我好鍾意去探索！下次去可能撞到大家XDD

搵食點：大食皇
搵食方向：葵涌葵富路7至11號葵涌廣場G層地下A83a舖
代價：$10