【又試新嘢】此M記不同那M記 試 MOS Cafe 即叫即製牛油果牛肉漢堡

喺M記出牛油果雞堡之前，我已經被另一間快餐店嘅牛油果菜式吸引咗。

登登登登，就係  MOS Café 嘅牛油果漢堡。

我一見到網上介紹，已經好想試。不過唔係間間分店都有，為咗食佢，太古咁遠我都照去！鬼叫呢個係「搵食有僑」嘅宗旨咩！

個包應該唔多人點，可能因為新，唔係好多人知啦。落單之後，坐喺度等咗接近15分鐘先有。不過，唔緊要啦，證明夠新鮮，即叫即製嘛。

個包勁大個，勁厚！根本唔可以企喺度，所以都係用「籃」上檯。

底同面兩塊包仲好熱，差啲燙到。塊漢堡扒一睇就知唔少嘢，勁厚，一定好足料。聽講話係用咗150克嘅澳洲和牛扒製成呢塊漢堡扒，所以真係份量十足！而牛油都唔少，有差唔多四分之一個。望落去都應該係新鮮嘅牛油果！

牛肉漢堡真係勁厚肉，又多汁，肉味夠濃！同朋友每人一半咁食，都唔會覺得少！，牛油果好似用嘢醃製過，味道同啲菜幾夾……加埋中間嘅蛋黃醬，食呢個包真係令人好滿足！

搵食點：MOS Cafe
搵食方向：太古康山道1-2號康怡廣場北座1樓F20號舖
代價：$39