【又試新嘢】泡芙Papa出新嘢！新加坡街頭吉士脆條

泡芙 papa 喺香港好多年，除咗萬聖節、聖誕節出下期間限定口味嘅泡芙，或者近年出埋抹茶同紫薯味泡芙之外，基本上都好少出新嘢。

不過，最近就新出咗呢個條狀物體。原來，呢條嘢係好似星洲街頭好出名嘅「吉士脆條」。呢條嘢個名叫「Kaze Kaze 脆條」，$24一條！

既然係新嘢，我就買條試下。其實製法同平時泡芙分別不大，中間嘅吉士都係喺客人落單之後先加入去。對我嚟講，驚喜欠奉，只係平時圓買嘅泡芙變咗形狀。

呢個泡芙脆條有超過10cm長，外面有一粒粒嘅碎杏仁粒。

脆條食落去，個口感同泡芙差唔多，不過呢個無流芙咁厚，好快就食到中間嘅吉士餡。

吉士餡即係平時食開嘅雲呢嗱吉士味，同外面嘅杏仁製造出外脆內軟嘅口感，杏仁粒香脆可口，吉士甜而不膩。吉士餡散落到由頭到尾都有，食呢條泡芙條絕對滿足過食平時嘅泡芙呢。

如果之後有多啲唔同嘅味道就好喇！

搵食點：Beard Papa's
搵食方向：荃灣廣場4樓一田超市百貨公司
代價：$24