每次週末去旺角，都唔太想留咁耐，因為周圍都多人，食飯又要排隊等位。好彩自己本身對餐廳環境要求唔高，乾淨光線充足就OK，所以有時會好「佬」咁樣去食熟食街市。
招牌菜係海南雞，咁就一定要點，當日仲要免費轉油飯，唔係唔轉下話？另外我跟餐配小食豬頸肉、再點咗泰式炒金邊粉、泰式無骨鳳爪，超滿足，食到勁飽。
泰式無骨海南雞飯配熱飲 $41
呢個份量，呢個價錢，其實真係好抵，仲要係油飯，單係睇樣都無得輸。味道又點先？雞肉唔算好滑，一半半啦，不過就肥瘦適中，雞皮同肉之間唔會出現大肥膏，雞皮好爽，正！啲人話食雞唔係雞皮係罪過，我覺得就適用於今次嘅雞肉喇！雞肉食落有香料味，無雪味，加埋個醬，酸酸甜甜咁，唔錯！
值得一讚嘅係個雞油飯，因為唔只色澤吸引，而且好香！雖然係油飯，但一啲都唔覺得油膩或者黏口，飯粒粒分明，又有少少薑黃味。如果平時可以單買油飯返屋企食就好喇！
跟餐配豬頸肉 $12
豬頸肉雖然得幾片，不過少食多滋味，已經好滿足。據說豬頸肉係打針位，所以唔好食咁多。薄薄幾片，但已經食到廚師嘅功架。豬頸肉燒得金黃焦香，味醃得好，滿足到我對豬頸肉嘅渴求。
泰式炒金邊粉 $46
泰式炒金邊粉係雞肉為主，仲有其他芽菜、魚蛋片同豆腐卜呢啲，但係就無蝦，所以價錢較相宜。雖然無蝦，但係風味不減！上檯時，香氣四溢，熱辣辣，就知鑊氣夠！金邊粉嘅份量都多，加埋啲餸，女仔會好飽，男人食都覺飽～～
泰式無骨鳳爪（一盒）$25
我好鍾意食雞腳，哈哈，係咪估我唔到？我已經唔記得咗一盒有幾多隻，但我覺得好多，唔知係咪因為我差唔多食晒全部嘅原因。因為同行人士食完一隻之後就話好辣，食唔到，搞到我要一個人啪晒去～*O*
整體嚟講，呢間小店以價錢而論，質素都算高，加上係良心店，再加分！！平時食泰國嘢邊度有咁平，呢度款式都多，要去多幾次試其他！
搵食點：泰風佳味海南雞
搵食方向：旺角上海街557號旺角綜合大樓2樓旺角熟食市場2號舖
