【又試新嘢】令人彈起嘅維記迷你阿華田味雪米糍

最近，因為某連鎖餅店推出咗阿華田味系列嘅蛋糕，所以令呢款之前已經面世咗嘅阿華田雪米糍變返焦點！

雖然之前出過，不過我就未食過，就趁呢個機會試下先。今次喺 OK 獨家發售，我家附近無，所以要喺公司附近買嚟食～

包裝上面啲卡通好得意，唔知食落係咪一樣咁迷人呢。

打開就見到4粒  CUTE 到爆炸嘅糯米糍，外面有啲白色嘅粉，同其他糯米糍一樣。不過呢種係迷你版，所以係4粒。

一咬，糯米糍皮好薄，勁薄，超煙韌；包住成顆阿華田味嘅雪糕。

雪糕濃味得嚟又夠滑，一啖一粒，真係令人好滿足，人都彈起！一個人食曬4粒，so EASY！

不過，獨食會肥，我最後都係跟同事開心share，每人一粒算喇！

即係點？一個字：試得過！

搵食點：OK便利店（獨家發售）
搵食方向：港九新界分店
代價：$7.5