【又試新嘢】日韓 $198放題 9大行星壽司+芝士拉雞

新餐廳梗係多人試，最近有間放題店，同時被2間media報導，一篇就讚，另一篇就話中伏，呢啲情況好少見。我一向都試慣新嘢，今次就約個朋友去試下啦！不過，報導話有個「九大行星」嘅壽司拼盤要提早預訂，咁犀利，我梗係唔錯過喇，訂位時就講埋喇。

去到餐廳5點幾，時間尚早，人不多。同其他食放題嘅地方比，呢度空間感大好多，環境夠闊落！呢個係第一個感覺，唔錯，起碼坐都坐得舒服啲。我哋靠窗坐，睇到街景。

呢度真係好多嘢食，你睇，連點單紙都有19張。呢度只有18張，因為第19張係揀咗升級料理之後，店員再另外拎嚟。

終於齊！

除咗落單紙上面嘅嘢食，飲品同雪糕都係自己出去拎。

雀巢雪糕相比其他放題店又似乎弱咗啲。但我喺點單紙上又見到有雪糕，唔知有咩分別？

可能熟食製作需時，第一個嚟嘅係魚生拼盤！影夠之後，就拿聲聲食。

啲蝦都幾大隻，味道鮮甜。

原來個拼盤後面藏住啲蟹，真係好surprised！

其他魚生唔逐樣講喇，太多款式喇！整體感覺都幾好，最緊要係食咗無肚痛，安全度過。你知啦，夏天食魚生就最驚變壞，搞到肚痛，味道都係其次。

個WASABI好搞笑，圓咕碌咁，唔通又係自己磨？

呢度主打日韓放題，應該係熟食先係推介，都係將焦點放返喺呢方面。

南瓜海鮮湯幾好味，南瓜味幾出，裡都又真係有海鮮，不過我睇唔出係乜。=P

壽司中規中矩，鰻魚壽司一向係我至愛。

我哋叫咗勁多熟食，有牛仔骨、蒜香牛柳粒、肥牛卷、煙肉荔枝卷、芝士年糕、炸豆腐、餃子、牛舌、豚肉串、薄燒牛肉、免治雞肉串、蕃薯仔、雞翼、炸蝦天婦羅、鹽燒虎蝦、日本魷魚仔、牛油燒粟米、帶子牛油燒、凍烏冬……仲有一啲食咗無影相XDD

 

呢個芝士拉雞應該吸引唔少人叫，鐵板上，睇落又真係幾好味咁。店員走之前，提醒我哋「趁熱食」。不過我哋好滋味咁食緊啲串燒，諗住等佢凍少少先食。

終於食芝士雞喇！可能等得太耐喇，啲芝士已經痴實個板，拉唔到上嚟……個感覺就好似香口膠咁，男朋友睇住我用盡九牛二虎之力咁拉，係咁係度笑我！！就係咁，呢碟芝士拉雞就咁被我哋遺棄咗，成為全晚嘅污點！

仲未見我開頭講嘅九大行星壽司？宜家就出場喇。嘩，嚟到真係「嘩」咗一聲！無諗過，喺放題店都食到呢啲咁特別、咁有心思嘅食物！每一個壽司（咁大個，應該叫「飯糰」）都唔同款，唔同口味，相似嘅地方就應該係每件都好圓碌碌，好似個乒乓波咁，好搞笑。

每款嘅飯同配料都唔一樣，有啲飯糰就混合咗蟹籽或者香料或菜……中間包嘅嘢都係唔同。不過每個都唔少份量，一個食2、3粒都已經好飽～我諗都係要有4人或以上先至好挑戰呢個九大行星！之後仲被我發現，原來唔只９粒，仲有一個遺留喺一角，即係「領隊」太陽（用三文魚包住啲蟹籽、甜蝦同埋拖羅蓉等）！（笑）

店員見到我開始食蟹，就醒目咁畀咗把剪刀我哋，真係體貼。

最後就係食甜品，試咗泡芙同雪糕。原來呢度啲雪糕係一球球咁包裝，嚟到嘅時候勁凍！白色係豆腐味，啡色係朱古力味，味道幾好，唔會好甜。不過要花少少時間同畀啲耐性，等佢溶，變軟。

泡芙中間有餡，有忌廉同朱古力餡2款，我哋揀咗朱古力味。仲試咗brownie，不過唔記得影，朱古力味幾濃，中間軟軟哋，有啲似食心太軟。

雖然我哋食咗咁多，但MENU上仲有好多嘢我哋都試，好似韓食——泡菜三文魚頭鍋、牛肉鍋、部隊鍋、泡菜海鮮豆腐鍋、冷麵、泡菜牛肉石鍋飯同鐵板芝士年糕……仲有拉麵同湯烏冬……好多嘢仲試唔到，個胃容量實在太有限了！

不過，我哋點咗咁多嘢食，竟然無漏嘢，真係要讚下廚房同侍應嘅合作！串燒同炸物款式多，份量足，味道都啱，唯獨係我食個條魷魚仔鹹咗，因為男朋友話佢個隻唔鹹。啲人話個芝士雞麻麻，我都同意呢個菜式係令人有啲失望，鬼叫自己凍咗先食咩。XDD諗起都覺得自己好好笑！

搵食點：三井日韓料理
搵食方向：旺角西洋菜南街 1N 兆萬中心3樓301室
代價：$198（升級料理＋$50），加一，視乎入座時間