【又試新嘢】維記紫薯雪米糍試食報告

最近瘋狂「紫薯」，又蛋撻，又大福，又芝士蛋糕，前幾日朋友仲報料話我知，維記繼綠茶雪米糍之後，再出埋紫薯味，我呢個紫薯控就點都要試！

呢個又要係7仔先搵到，OK係無架！ 

包裝係長盒形，同綠茶味唔同，呢個係迷你版，同阿華田味一樣。

打開裡面，有4個獨立包裝，細細粒，一粒２啖，幾得意。

拆開，外表同大粒嘅無咩分別，都係有啲粉，不過係紫色，同香芋味好似。可能就係因為要區分香芋味，所以呢個口味係迷你版。

一如既往，外皮勁薄，咬落軟身煙韌～

至於味道呢，失望呀T^T無咩紫薯味，仲要好甜……整體嚟講仲失望過綠茶味。上網睇返先知，原來好多人都覺得甜，仲話食返香芋味好過……

點解會無紫薯味咁奇怪？睇返成分表，點知原來一啲紫薯嘅嘢都無 =.=就只有糖……

唉，今次試新嘢竟然中伏 ><

搵食點：7-Eleven
搵食方向：梗有一間喺左近
代價：$9