回頭必食推介：啖啖肉嫩滑雞叉燒拉麵

認識我的人都知道我甚少吃拉麵，不過，身邊總是不乏拉麵迷，所以有時還是會於大大小小的拉麵店作客。今次，就跟其中一個拉麵迷朋友來這家霸氣十足，來自日本的過江龍拉麵店「霸嗎拉麵」吃晚餐。

麵店是自助形式運作，那天我們坐在面對著牆的排椅上，桌上已經有水、水杯、碟和各種調味粉和醬。客人需要自己斟水，預備調味碟……下單呢？就可以看餐牌，然後在點單紙上在想吃的東西旁作記號或註明數量，再交給店員下單。

特盛炙燒豚肉拉麵  $118

我跟朋友看到招牌豚肉拉麵圖片後，都覺得很吸引，對其可是十分期待。然而，當它出現在我們眼前時，吸引度大減，分數亦驟跌。為什麼？因為熱辣辣拉麵上，竟然是四大片出乎意料地充滿肥肉的厚切五花腩！我們對此十分失望……

你可能會覺得我們大驚小怪，而五花腩多肥肉是正常不過的事……但是，無論我們參考餐牌，或是其他人上載的食評相片，那一片片豚肉似乎沒我們那塊的肥膩……

雖然如此，我跟朋友都努力把拉麵完成，不做大嘥鬼。我跟朋友分享，撇除肥肉的部分，豚肉層次分明，即使是瘦肉，也是軟稔可口，散發著炙燒的香味。

麵條選擇了適中（硬度），吃起來不硬也不過軟，是合適的硬度。湯底香濃但不油膩，是較可取的出品。

醬燜雞叉燒味玉拉麵  $88

這就是我的必食推介！我一直都在思考，雞叉燒到底是甚麼？是雞肉還是豬肉？現在，謎底揭開了，是雞肉！

餐廳把雞肉做得像叉燒一樣，有兩大片，每片都是厚厚的。雞肉燒過，傳來一陣焦香。肉質軟身嫩滑，令我一度以為是在吃雞髀肉，口感跟一般的叉燒完全不同。湯底呈白色，不太油膩，而且不似豚肉拉麵的濃湯，而是清清的，正中下懷，亦配合雞肉拉麵的口味。

除雞叉燒外，還有不少配菜，如木耳及玉白。玉白即雞蛋，這是半熟蛋（我不吃的，給友人）。據朋友描述，那隻蛋該是日本蛋，蛋味很香很濃，令她難忘。

羽根燒餃子(5件) $35

其實我是個餃子控，到日式麵店也愛點餃子。我猶豫是否向友人提出吃餃子時，想不到她比我更早提議呢！我當然立即說好！

這個「羽根燒餃子」的賣相很吸引，餃子底煎出一層金黃色的薄脆，吃起來卜卜脆。餃子一連五隻，一邊煎得香脆，另一邊則較軟身。餃子皮薄餡多，菜與肉的比例恰恰好。

毛豆 $20

其實是枝豆，跟平時吃的分別不大，只是外面多灑了一些鹽，佐酒應該會更棒！

餐牌參考

搵食點：霸嗎拉麵
搵食方向：中環德己立街22號地舖

食韓式炸雞農夫包，仲有懶人最啱Juicy無骨焗雞

好耐無食韓國嘢，今次就約兩個朋友去試下呢間喺中環開新分店嘅韓式炸雞連鎖店。品牌原來係韓國開過嚟，所以對食物有一定期望，亦唔想有「失望」。看到在座的人都會點好似農夫包咁嘅炸雞，應該係餐廳招牌，我哋都揀咗，另外亦揀了焗雞同其他小食。

太陽芝士炸雞 ($198)

呢道菜真係好邪惡，因為勁多芝士！賣相真係好似一個太陽，畀啲想像力，周邊的雞就好似太陽照耀時發出的光芒，而中間的農夫包內的芝士就係個太陽的中心！（係咪好有想像力？）

炸雞有7件，上面已經有白色嘅醬，吃起來似酸忌廉味；拎起食的時候，除咗會沾上鐵板上嘅芝士外，仲要將雞件放入農夫包裡面嘅芝士漿內，（勁澎湃拉絲效果！）提升芝士味道層次！

  

不過，我喺未沾醬之前，先試咗炸雞一啖。外皮香脆，即使唔蘸醬都好味。雞肉嫩滑多汁，唔錯！蘸醬同芝士之後，味道又係另一個層次！因為芝士好香，但唔會好鹹好「漏」。啲醬除咗配炸雞，仲可以配麵包食，好似農夫包咁。麵包吸咗芝士醬之後，好香濃芝士味，每咬一啖，就狂咇芝士，好邪惡！

首爾風味焗雞 ($130)

試咗炸雞，我哋又想試埋唔炸嘅雞，揀嚟揀去，最終揀咗呢個有隻手指公嘅「首爾風味焗雞」！焗雞不經油炸，感覺沒那麼油膩，減低了邪惡感。

雖然係焗，但賣相一樣吸引！金黃嘅外表令人垂涎，旁邊配有蒜蓉芝士醬。未吃，已經聞到香味，焗雞的雞皮焗著乾而香脆，而雞肉嫩滑多汁，火候恰到好處，完全不會出現過熟／未熟的情況，令人一試難忘。

醬汁如何？亦有淺嚐一下，但覺得還是原味更好呢！

韓式涼拌水冷麵 ($90)

諗住天氣熱，叫個水冷麵食，就無咁「立」。但係呢個水冷麵味道無我預期中咁吸引，雖然都係凍，不過唔似想像中咁爽口彈牙，感覺一般！

炸紫菜卷串 ($60)

炸紫菜串一碟有兩串，共六件。其實係用紫菜包住一啲韓國粉絲，之後再炸。但我個人覺得口感同味道都一般，好普通，可以唔試。

芝士薯條拼芝士麵包粒 ($75)

最加分嘅就係我哋最後點嘅呢個小食！話就話小食，不過份量好多，我哋都食唔曬～裡面包括必食嘅芝士薯條同埋芝士麵包，而最吸引嘅其實係上面好香好香，好濃嘅芝士粉，再另配一個沙律醬。

薯條係我最愛嘅粗薯條，而且岩岩炸好，香脆可口，外脆內軟，口感勁正；又無「油膉味」，令人食得痛快！薯條滿佈芝士粉，就好似 m 記嘅 SHAKE SHAKE 薯條咁，每條薯片都「痴」滿晒芝士粉，食落唔會好似芝士醬咁「漏」，好鬼正！

而芝士麵包粒炸到金黃色，入口脆卜卜，再蘸旁邊的沙律醬一起食，完全無違和感呢！

餐廳選址中環蘭桂芳，裝修走型格酒吧路線，亦有吧檯，有酒牌～

我哋咁啱坐窗邊又可以望到外面，都算OK～如果啲座位可以再闊落啲就更加好了！ 

搵食點：Sodam Chicken
搵食方向：中環蘭桂坊雲咸街31號地舖

MENU 參考