【又試新嘢】Lays 樂事宇治抹茶味薯片

上星期食完凍檸茶薯片之後，第2日就收到風話今個星期會出抹茶味薯片，呢期薯片界真係勁嘞！
　　重溫：【又試新嘢】珍珍凍檸茶薯片 回味茶餐廳味道

消息話今日出，不過我昨晚就已經喺7仔買到！唔講咁多，即刻話你係咪伏！

包裝：黑配綠，感覺唔錯，一啲娘味都無，黑色更加令人覺得COOL COOL哋，襯返抹茶隻綠色，係型嘅。個人覺得比其他 LAYS 薯片的包裝更令人眼前一亮呢！

薯片一打開，聞到淡淡的抹茶味，雖然唔係好濃，但都幾持久。薯片係波浪紋，唔同平時食嘅Lays薯片。因為加咗抹茶粉，可以見到薯片都係淡淡嘅綠色，感覺令人覺得幾「抹茶」。

味道呢？一食落去，好似無咩味，原來要等啲抹茶味慢慢滲出嚟，去到喉嚨個位，就感覺到抹茶嘅存在。期間，你會發現薯片係甜嘅，唔係平時食嘅鹹薯片！不過，對我嚟講，味道係可以接受。

抹茶控一定會問，有無回甘？係無架，如果薯片有回甘味（好似苦苦哋），應該幾難食？

整體而言，味道係比上次嘅凍檸茶味易接受多，不過無咁大驚喜囉。個人依然好欣賞凍檸茶嘅「冰凍味」XDDDD

睇返成份表，原來糖比抹茶粉用得多，難怪變咗甜薯片啦！

值得一提嘅係，幾位喜歡抹茶嘅女同事都話幾好味，其中一位抹茶控更加食完又食XD大家可以試下呀！

搵食點：7-11
代價：$12.5