零食界又有新搞作，令人意想不到嘅係，珍珍薯片出新嘢——凍檸茶薯片！
第一次聽到嗰時，真係已經有啲 bad feelings，感覺就係蜜糖芥末味薯片嘅朋友。話雖如此，話明新嘢，就點都買返包嚟試下。
唔知係咪因為傳媒幾日前已經出曬報導，又試食咗，就算我10月25號當日去買，都唔係間間有得賣。到夜晚屋企樓下7仔見到，貨架都員係得返一包，真係咁搶手？唔講咁多，立即試味！
一打開，勁大陣檸茶味飄出嚟，唔係，應該係凍檸茶先啱！因為聞聞下，會有一種好似聞到薄荷味嘅感覺，可能呢個就係「凍」嘅精髓。
倒出嚟，薯片外形同顏色跟其他口味嘅薯片無分別，唔知食落點樣呢？
嘩！真係超濃檸茶味喎！首先係甜甜哋，之後會慢慢滲出茶味同酸味。至於「凍」味呢？到你將薯片吞到落喉嚨時，涼涼嘅感覺就出嚟喇，好得意！飲凍檸茶都係為咗咁唧XDD
其實呢，簡單啲，呢包珍珍凍檸茶薯片口感脆卜卜，味道就似係飲已經絕版咗嘅雀巢冰極檸檬茶咁嘞！如果你係「雀巢冰極檸檬茶」嘅fans，快啲嗱嗱聲去買呢包薯片嚟感受下涼快嘅感覺啦！
題外話：如果可以細包啲就 perfect 了～～一個人食曬咁大包之後會好凍架……
代價：$11
沒有留言:
張貼留言