【九龍灣搵食】芝士脆雞翼！人氣長龍甜品店

之前去淘大商場同  friend 聚會食烏冬，食完之後就發現有間美式新餐廳，所以今次就約喺附近住嘅舊同學一齊試，順利聚下。以前喺附近讀書，嗰時無咩好食，估唔到宜家多咗咁多新餐廳，成為一個搵食開飯點。好似隔離得寶花園都有個 food court，之前都有  blogger 同埋雜誌介紹過，有機會要去試埋。

大家當日都準備收工，6點  sharp 走，去到餐廳唔算多人，去到就有位。我哋無叫SET，單叫食物，所以無飲品。因為我發現餐廳主打手工啤，不過我同舊同學都唔飲，索性健康啲，飲水叫嘢食算，之後再食甜品。

點咗「帶子飯」、「牛肉漢堡」及「芝士脆雞翼」。唔好以為好少嘢，食起上嚟好多，我哋差啲食唔曬。

帶子意大利飯份量都算多，兩個都可以舀到2次嚟食。帶子好大隻，肉好厚身，食起嚟唔會有渣滓，口感滑嫩，鮮味十足。意大利飯中間有菇菌，感覺健康啲。個汁係白汁，但唔會好「漏」。

芝士脆雞翼好好味呀！外皮真係超脆！

一拎上嚟，你睇下，真係有芝士架！！嘻嘻，好開心！啲肉入味又嫩滑，真係食多幾隻都唔厭～～

除咗手工啤酒，呢度係美式餐廳，漢堡都係拿手菜，所以我哋叫了一個開心 share！呢個係安格斯牛肉蘑菇漢堡。牛扒揀咗7成熟，因為同學唔食得咁生。

個包一嚟到，我哋都好驚喜，因為好大個！大個之餘，仲配有粗薯條！

我哋2個慶幸最初無再點一個薯條，否則就浪費了。因為要一人一半，我哋切開個包。嘩，單係見到個橫切面都覺得壯觀啦～咁足料！牛肉漢堡又厚又多汁……我哋一邊切，已經一邊流緊汁。漢堡包包身鬆軟，表面有啲脆同熱，估計有烘過。牛肉多汁，而且有肉味；蘑菇厚、大隻又有好多汁，可以起到解膩作用。

另外，我哋覺得啲薯條好好味！因為夠厚切，有口感。而且，表皮香脆，有薯味。

不過最後食得太飽，行街行咗1個鐘之後，先有空間食甜品。

點解明明飽都堅持要食甜品？因為呢間甜品店係人氣長龍店。以前讀書嗰陣，就係迷上咗呢度嘅麥提莎糯米糍，之後自己就嘗試整。今次難得嚟到，梗係要回味下。

等咗約15分鐘就有位，頭先等位嗰時已經睇定餐牌落咗單。因為係長龍店，所以甜品店就採取呢個方法去縮短等候時間。一坐低無幾耐，就有得食喇！麥提莎糯米糍，一碟6粒，2個人食都幾滿足！

外皮軟糯煙韌，皮唔算厚；中間包住一整粒麥提莎，仲係脆架，好感動。點解人哋可以包得咁靚，我就唔得？點解人哋啲皮同麥提莎可以咁乾爽，我自己整就出唔到呢個效果？

另一樣甜品就係「紫薯心太軟」。自從上次喺另一間甜品店食過同一款心太軟之後，我就發現紫薯心太軟要整得好食，似乎一啲都唔容易。上次嗰間唔好食，今次呢間嘅出品，同樣令我失望。雖然係比上次嘅好啲，但都係一般般。

無咩紫薯味，朱古力味多啲，而且外面稍為乾咗啲～

我要繼續尋找美味嘅紫薯心太軟！！

  

今次九龍灣搵食都算係咁啦，好飽～～～

搵食點：NO.9

搵食方向：九龍灣淘大商場2期地下G196-199號地舖

搵食點：金滿堂甜品
搵食方向：九龍灣淘大商場2期地下G201號舖

【民豐粉麵行】足料韮菜餅

聽人講呢度啲韮菜餅呀，餃子呀都好好味，呢日去開荃灣，就試下啦！

因為之前經過問過，知道要下午先有得賣，所以今次就醒目咗，３點幾先去。

韮菜餅到手，可惜依然買唔到餃子。

韮菜餅同餃子都係韮菜唧，應該差唔多吧！

韮菜餅好油，個紙袋都「索」咗啲油變稔咗……

食落去，韮菜餅啱啱整起，所以熱辣辣，好香口。不過，食咗幾啖，我就已經覺得好油膩，唔想再食落去喇～

不過，講真，塊餅真係好足料，好多韮菜～不過對我嚟講就真係油咗啲囉～～～

下次都係試返餃子啦～

搵食點：民豐粉麵行

搵食方向：荃灣街市街35號

代價：$11

【林昌記】魚蛋彈牙爽口 不負所望

之前喺荃灣見到有分店，但無食到；呢日經過旺角分店就試下啦！

 早排見到好多人話呢度嘅魚蛋好彈牙爽口，有魚味，唔試就走寶咁，今次我就一於試下。

食落口感真係唔錯，而且真係夠曬爽口彈牙，同街市買嗰啲真係唔同嘅。要咗一半原味，一半咖哩，但其實無乜分別，啲咖哩汁都係之後先淋上去嘅XDD

總結就係不負所望啦～只係，我唔太鍾意佢一買就要買$10蚊咁多，我都唔係想食咁多粒lol

搵食點：林昌記

搵食方向：旺角砵蘭街147–149號祥興樓地下B1舖

代價：$10/7粒

【彩晶軒】酒樓飲茶 點心以外的新嘗試！

平時到酒樓吃的都不外乎是蝦餃燒賣、鳳爪排骨這些點心，是次也不例外。不過，今次飲茶就意外地嘗到這些較特別的菜式和甜品，有種「發現新大陸」的興奮感覺！

這個「秘製豬手」，即是冰鎮豬手。上面有不少蒜和薑，令我想起蒜泥白肉。不過，豬手主要的是豬皮，肉的部分較少，所以吃起來爽脆，夏天吃最佳！豬手的調味沒有太濃，主要靠下面的醬汁提味，作為飯前冷盤是不錯的選擇！

另一個有趣的發現是多了很多新式甜品，例如綠茶奶凍和士多啤梨心太軟。

綠茶奶凍入口幼滑，奶味跟綠茶味混在一起，沒有任何一方要搶味。上面的士多啤梨挺清甜，唯那些忌廉有點多此一舉。

士多啤梨心太軟實在令我感到意外，因為我在西式甜品店也較少見。這個心太軟做得很精緻，送在勺子上，恰恰好一口一個。

其實，心太軟吃少許已經令人覺得膩，而這個心太軟的大小就最適合不過，吃3、4口就已經滿足了女生們吃甜品的欲望，又可以滿足她們的視覺效果（流心），亦不會浪費食物。我十分欣賞廚師的細心。

心太軟內都是朱古力色的，除了外面清甜的士多啤梨外，流心的朱古力漿也有士多啤梨味，不過賣相看起來就被朱古力的顏色蓋過了。

中式酒樓有如此水準，實屬不錯！大家不妨一試！

搵食點：彩晶軒
搵食方向： 屯門鄉事會路2A號 H.A.N.D.S S區3樓S-321號舖

【森川弁当】 貪新鮮 首嚐日式便當

平日都係帶飯多，今日突然間想食日本嘢，成日經過呢間便當店都想試，今日就一於去會下佢～

那天去到該有點遲，不少飯餐也售完了，而我想試的鰻魚飯就已經停售。怎樣也好，飯還是要吃，於是點了「金菇肥牛卷」便當（好港式喎？）。

嗰度無得堂食，只有外賣。我就拎咗返OFFICE食。

佢個盤分開一格格，個袋又夠大，所以拎到返公司，啲食物都無咩走位同變形，依然整齊。另外仲有一碗胡麻醬沙律，清新健康！

便當盒內食物好豐富，有塊寫有「森川」二字的玉子，南瓜同埋一啲漬物配菜。飯的份量都算多，女仔食都夠飽。米飯口感軟糯，上面淋咗醬汁，有啲芝麻，令白飯食起嚟都滋味啲。

呢個便當嘅重點一定係啲金菇肥牛卷，有4大件，每件都幾大，又夠厚身。肥牛好似吉野家牛肉啲味，有少少甜點。包住咁多金針菇，一定要夠多汁。啲肥牛都算JUICY！值得一提嘅係，每一個卷裡面都有超多爆多嘅金針菇，捲到勁厚，份量多平時食開個啲一半！真係多到好誇張！

所以，最後食完呢個便當，我係勁飽～～～

搵食點：森川弁当
搵食方向：荔枝角長沙灣道833號長沙灣廣場2樓206號舖

【又試新嘢】此M記不同那M記 試 MOS Cafe 即叫即製牛油果牛肉漢堡

喺M記出牛油果雞堡之前，我已經被另一間快餐店嘅牛油果菜式吸引咗。

登登登登，就係  MOS Café 嘅牛油果漢堡。

我一見到網上介紹，已經好想試。不過唔係間間分店都有，為咗食佢，太古咁遠我都照去！鬼叫呢個係「搵食有僑」嘅宗旨咩！

個包應該唔多人點，可能因為新，唔係好多人知啦。落單之後，坐喺度等咗接近15分鐘先有。不過，唔緊要啦，證明夠新鮮，即叫即製嘛。

個包勁大個，勁厚！根本唔可以企喺度，所以都係用「籃」上檯。

底同面兩塊包仲好熱，差啲燙到。塊漢堡扒一睇就知唔少嘢，勁厚，一定好足料。聽講話係用咗150克嘅澳洲和牛扒製成呢塊漢堡扒，所以真係份量十足！而牛油都唔少，有差唔多四分之一個。望落去都應該係新鮮嘅牛油果！

牛肉漢堡真係勁厚肉，又多汁，肉味夠濃！同朋友每人一半咁食，都唔會覺得少！，牛油果好似用嘢醃製過，味道同啲菜幾夾……加埋中間嘅蛋黃醬，食呢個包真係令人好滿足！

搵食點：MOS Cafe
搵食方向：太古康山道1-2號康怡廣場北座1樓F20號舖
代價：$39

【魂燒．海鮮．居酒屋】足料海膽飯 肥又厚鰻魚飯

朋友見到好多人介紹呢度嘅海膽飯，就話嚟試下。我呢啲鍾意試新嘢嘅人就冇咩所謂啦，一於捨命陪閨密！

店舖晚上6點先開，7點去到，已經差唔多滿座。呢度落單好似茶樓飲茶咁自己用筆係落單紙度寫。朋友咩都唔理，就即時喺「秘製海膽飯」隔離寫咗個「１」字。之後再點埋「汁醬鰻魚飯」、「秘製海膽飯」、「薩摩家芝士棒」、「三燒安格斯一口牛」、「香桃雪葩」同「柚子蛋糕」。

「三燒安格斯一口牛」串燒竟然最先嚟！

三燒即係3種口味，包括海鹽、西京同秘汁！先講口感，三款牛肉嘅口感有咬口，有肉味，夠Juicy，但唔會嚡或韌；味道方面，個人就比較喜歡西京口味多啲，因為甜甜哋，幾特別。

汁醬鰻魚飯

我係鰻魚迷，見到鰻魚飯唔貴，就諗唔無諗，點嚟試。話明「汁醬鰻魚飯」，鰻魚上面嘅汁一定唔可以少。我好鍾意旁邊有勁多粟米，因為我好鍾意食粟米！

鰻魚份量夠，長得嚟都叫有啲厚度，食落有口感。咬落滑溜軟稔，重點係無咩骨，鰻魚皮亦唔韌（之前有食過一啲塊皮勁韌，食得一啲都唔痛快！），令人食得暢快！鰻魚汁甜度適中，不過如果想用嚟撈飯食嘅話，就未必夠。建議落單嗰時叫「多汁」！（唔知得唔得呢？）

薩摩家芝士棒

估唔到呢枝芝士棒又幾過癮！一枝燒得焦香嘅魚棒，裡面有熱溶芝士，哈哈，好邪惡，但食得特別開心！

秘製海膽飯

朋友等到頸都長，佢個目標終於出現！成板海膽，佢見到真係兩眼發光！

君子不奪人所好，我循例試咗一啖，剩低嘅都畀佢獨享。海膽食落甜甜哋，冇腥味，冇異味。雖然唔知係咩海膽，但幾軟滑。

呢個飯食法幾特別，飯中間有個生蛋黃，食嗰時可以撈埋飯一齊食，似壽喜燒食法。不過我朋友就食唔慣，覺得唔撈啱佢口味啲。不過佢覺得海膽真係唔錯，好滿足！

但唔知當日係咪太多人點飯嘅關係，我同朋友都覺得白飯有啲硬，不夠軟身。可能剛剛煲，未熟透？

香桃雪葩

叫得香桃雪葩，個樣又真係幾似桃。中間都係桃味嘅雪葩。口感無雪糕咁奶味，果味濃啲，清新啲，食完感覺都唔會膩。

柚子蛋糕（限售）

因為夏天，所以揀咗個無咁「漏」嘅蛋糕嚟做甜品。柚子蛋糕唔係好多地方有，而呢度竟然有，仲話係每日限量嘅。蛋糕面上有啲雪，可能啱啱由雪櫃拎出嚟嘅關係。雖然係咁，但食落又唔會覺得好硬，好凍嘅感覺。柚子味幾重，橫切面都見到有柚子皮顆粒，果然真材實料。估唔到居酒屋食甜品都無中伏！

搵食點：魂燒．海鮮．居酒屋
搵食方向：太子太子道西106號地下D舖