【又試新嘢】令人彈起嘅維記迷你阿華田味雪米糍

最近，因為某連鎖餅店推出咗阿華田味系列嘅蛋糕，所以令呢款之前已經面世咗嘅阿華田雪米糍變返焦點！

雖然之前出過，不過我就未食過，就趁呢個機會試下先。今次喺 OK 獨家發售，我家附近無，所以要喺公司附近買嚟食～

包裝上面啲卡通好得意，唔知食落係咪一樣咁迷人呢。

打開就見到4粒  CUTE 到爆炸嘅糯米糍，外面有啲白色嘅粉，同其他糯米糍一樣。不過呢種係迷你版，所以係4粒。

一咬，糯米糍皮好薄，勁薄，超煙韌；包住成顆阿華田味嘅雪糕。

雪糕濃味得嚟又夠滑，一啖一粒，真係令人好滿足，人都彈起！一個人食曬4粒，so EASY！

不過，獨食會肥，我最後都係跟同事開心share，每人一粒算喇！

即係點？一個字：試得過！

搵食點：OK便利店（獨家發售）
搵食方向：港九新界分店
代價：$7.5

紫薯甜品的引誘

我同朋友都係紫薯迷，一直都好想試呢間，但拖拖拖。上２個星期，我喺FACEBOOK見到話嚟緊要轉餐牌，紫薯嘢食會暫停供應，所以就嗱嗱聲拉個朋友去食！

我哋冇食到LUNCH，所以叫咗個主食，再加2個紫薯甜品！

-          菠菜蟹肉意大利飯 ($79)

-          鑊仔紫薯 ($89

-          雪山 ($89)

本來我們想叫另一個意大利飯，可能因為星期日嘅關係，太多人外出用餐，店員說已經售完，那我們便叫咗呢個「菠菜蟹肉意大利飯」。

賣相還可以，驟眼看上去，菠菜並不少，蟹肉呢，似乎不太多。這個意大利飯汁多了點，雖然我知道有啲人係鍾意多汁，不過我自己就喜歡剛剛恰到好處的比例。可能因為太多汁，所以飯不會硬，是比較稔身嘅口感。

吃著也聞到菠菜味，真係好多菠菜呀。哈哈。蟹肉似乎有點少，雖然能吃到一些，但不太「覺眼」，可能係因為太碎，同啲飯撈埋一齊啦！呢方面店家可以改善下，滿足返啲蟹迷都好丫～

呢個紫薯雪山，睇上去幾吸引。除咗有一座好似厚切熱香餅咁嘅雪山，上面放咗蜂巢，隔離配咗一球雲呢嗱雪糕，仲有一小樽蜜糖。雪糕上見到一個個黑點，其實唔係變壞，嗰啲係雲呢嗱籽，即係說明係真材實料啦！

把蜜糖倒在雪山上，增加雪山嘅味道層次。呢個雪山嘅口感似係食緊鬆軟嘅紫薯味蛋糕，好綿密；中間有紫薯蓉，感覺有點濕軟。

蜂巢點樣玩？一定唔係就咁咬！原來中間有蜜糖，只要用叉輕壓，內裡嘅蜜糖就會流出來，很特別呢！

　　　　　 

朋友最期待嘅鑊仔紫薯窩夫啊！嚟到嘅時候，店員就將紫薯汁倒落鑊仔度，即時煙霧瀰漫，哈哈，係有啲誇張咗。啲紫薯汁喺鑊仔裡面發出「滋滋」聲，幾分鐘之後，就無聲喇。

窩夫上面有一球紫薯蓉同埋雲呢拿雪糕。首先食窩夫，一切就見到中間有紫薯餡，我同朋友都好開心～

試咗一啖原味之後，就沾啲雪糕同紫薯一齊食，感覺真係好好多。至少食起上嚟無咁乾，加上有種冷熱交融，外脆內軟嘅感覺，真係令人好興奮！雪糕同紫薯雪山嘅一樣，都係好實在嘅雲呢拿味，正！

如果大家都想食，就要留意返 Ocio 嘅  Facebook ，佢哋應該都會公佈幾時會推出返紫薯甜品架！

搵食點：Ocio

搵食方向：旺角煙廠街33號朗廷軒地下B舖

代價：人均約$100

【韓風繼續吹】Best of the Best Quality (BBQ Chicken) 傳說中的大學研究所炸雞

上年呢間炸雞店開個陣，我就已經想試。不過，網上成日見啲人話排隊等好耐，所以一直都未試。今晚放工放得早，加上飯腳又咁岩得閒，見係平日，咁咪玩即興去試囉。好彩，都唔係好多人！

去到排咗一陣，就入去坐低嚕。店員放下餐牌之後，喺我們揀緊食物嘅期間，就拎咗啲前菜嚟。不過，我不嬲都對醃漬物不大興趣，所以我無咩點食。我要留返個肚食炸雞。

我同飯腳好快就揀好咗要食嘅雞，就係好出名嘅「蜂蜜脆片炸雞」同埋店員都話辣嘅「雙重芝士辣雞」（ß飯腳喜歡辣）。甜品方面，我就揀咗新出嘅「紅餅」同埋「紫薯雪山」，睇相覺得好吸引，好想試！

未講食物之前，講下呢間嘢係做咩嘅先。原來呢間炸雞有好多分店，過人之處呢就係佢喺韓國竟然會有間研究所去研究點樣炮製唔同部位嘅雞，好似好專業咁～我從來都無諗過會有咁嘅研究所。而BBQ Chicken 裡面嘅 BBQ，唔係求其改，亦都唔係同燒烤有關嘅意思，而係指 “Best of the Best Quality”。嘩，乜原來係暗地裡寸嘴 XD

蜂蜜脆片炸雞【標準】($125)

一拎到嚟，我就已經聞到勁香嘅蜜糖味。飯腳超餓，不停叫我快啲影完畀佢食。炸雞唔係只有雞翼、雞髀，而係唔同部分都有。炸雞睇落去唔係好油，唔知食又點呢？

一拎上手，咦，隻手都唔多覺好油，咁睇嚟呢度嘅炸雞都算健康，唔係用咗好多油去炸，更加應該唔係用千年油啦XDD呢個炸雞嘅特別之處係外面加咗粟米片同蜜糖，口感同味道嘅層次都提升咗。未食已經聞到好香好甜嘅蜜糖味，勁吸引！外皮香脆，甜甜哋；雞肉好滑，一啲都唔「鞋」，配合得好好！；食食下，我見到原來除咗有粟米片，仲有我最鍾意嘅提子乾呀！超開心～

另外試嘅係「雙重芝士辣雞」($98)。

呢個係用煎PAN上嘅，所以夠熱，芝士先可以停留係半溶狀，有拉芝效果。鍋內有一邊係芝士一邊係雞，同埋一啲配菜，例如薯仔、紅蘿蔔……食呢個，梗係唔可以唔拉芝。用雞肉蘸上芝士，再將佢拉起捲動，就營造出拉芝效果。真係睇見都興奮。然而，比較之下，我就鍾意第一款雞多啲，因為呢個太辣，同埋芝士有點膩（我唔多食得辣同唔係芝士迷 =P）。不過飯腳就鍾意夠辣，哈哈。

紅餅($48)

原來呢個紅餅，即係日本好hit嘅酥皮鯛魚燒（紅豆餡）。

我好鍾意食呀！佢即叫即整，上檯個時熱辣辣，我食到邊緣位嗰啲焦香部份，好正！外皮酥脆，同牛角包有得揮。外面啲焦糖好香口，中間嘅紅豆餡唔會好甜，啱啱好，我對呢個甜品好滿意。

紫薯雪山($60)

紫薯迷嘅我，見到呢個新出嘅甜品，又點會唔試丫？呢座雪出真係好大座，好彩我有飯腳一齊Share～紫薯係邊？就係冰山上面嗰啲紫色喇。原來嗰啲係紫薯味嘅粉末，真係未見過，今次真係大開眼界！XD雪山其實係刨冰，而除咗大家見到嘅雪糕球之外，周圍仲有啲藍莓。雪糕係雲呢拿味，同紫薯粉都幾夾，配埋藍莓一齊食都唔錯！

整體嚟講，我覺得我哋點嘅食物幾好丫，可能叫我啱口味掛～食嘢，最緊要叫自己啱食嘛！

搵食點：BBQ Chicken Premium Chicken

搵食方向：銅鑼灣謝斐道500號維安商業大廈地下

代價：每人平均 $150

【又試新嘢】台灣嚟嘅Joyful Farm有機生態農作天然果乾

前幾日，朋友知我鍾意試新嘢，就送咗啲台灣當地有機果乾畀我食！台灣嘢食喎，終於唔係鳳梨酥太陽餅嗰喇！試下都好！所謂「獨食能肥」，樽樽都咁大樽，我梗係同屋企人同朋友仔分享，齊齊試味啦！

呢度有5種味，包括：秋葵、香菇、士多啤梨、菠蘿同芒果；主要係2類，頭２款係鹹，後3者就係水果乾，甜味為主。每種味都各有支持者，結果都幾令人意想不到！因為最多人鍾意嘅，竟然係「香菇脆片」！

  

香菇外形同平時分別唔大，不過就烘乾咗，但依然KEEP到個菇形。

咬落去幾脆口，乾爽，一啲都唔油，更加唔硬；味道鹹鹹地，之後菇味慢慢出嚟……你會發現啲菇嘅香味會愈食愈濃郁，但絕對唔會令人抗拒！就連我屋企最「奄尖」嘅老豆都話好食，佢仲愈食愈多，停唔到口添！

秋葵乾相對嚟講就無咁受歡迎，可能因為唔係人人都接受到秋葵中間獨有嘅「黏滑汁液」有關。不過，其實嗰啲汁液先有益，係秋葵最有價值嘅嘢。估唔到整咗秋葵乾都可以保存到，真係幾勁。我啲朋友覺得幾特別，覺得脆卜卜，好過食薯條！

另外嗰3種都係水果乾，芒果乾大家平時都食得多，呢隻都係差唔多，不過大塊啲，我就唔再多講，反而想講下士多啤梨乾同菠蘿乾。

士多啤梨乾睇落去個樣就麻麻，因為水分無咗，士多啤梨收縮之餘，顏色仲變暗咗，平時啲士多啤梨擺得耐都會咁，好正常。唔知味道係點呢？呢個果乾又唔係好似平時個啲抽到好乾，食落反而濕濕哋，但係拎上手就好乾爽，值得一讚。

呢個士多啤梨酸酸甜甜，軟軟哋，有得咬下。
係呀，我知似咩喇，好似食緊軟糖呀！
唔怪知得，家姐個女話鍾意食啦～

菠蘿乾係我最期待嘅，因為台灣出名係鳳梨酥，啲菠蘿應該唔差得去邊。

一打開，就已經聞到超香濃嘅菠蘿味！即係話係用新鮮菠蘿，唔係罐頭菠蘿啦～

每件都好大，就係原個菠蘿橫切成片之後烘為乾，真係好堅，真材實料喎。菠蘿食起上嚟無士多啤梨咁「濕」，但又唔會好乾，食落都有汁，味道同平時食嘅新鮮菠蘿差唔多，甜中帶酸；但如果同士多啤梨比，就似乎係菠蘿乾酸啲啲。

呢啲果乾擺喺公司做小食真係無得輸！真係好多謝朋友仔請我食啲呢！

我有朋友試完之後，問我係邊可以買到……咁我就問返請我食嘅朋友仔啦～原來宜家香港有公司做緊代理，喺香港都買得到喇～

搵食點：Likeschannel

搵食方向：旺角登打士街56號栢裕商業中心17樓1733-35室

代價：芒果/菠蘿 $48@、士多啤梨/秋葵/香菇 $58@，優惠價：$148 for 3

【和藏】工廈覓食 隱世日西半自助餐

香港舖租貴，所以近年唔少食肆都進駐工廠區。唔好以為開喺工業區嘅食肆質素就一定唔好，其實當中有唔少係卧虎藏龍。

葵涌區比較少有提供自助餐、放題之類嘅餐廳，最近聽朋友講話有一間，一查地址發現其實都幾近地鐵站，所以今日就去試下。

平時好少食自助餐同放題嘅我，食半自助餐就岩曬。因為我唔使出去同人搶嘢食，但又可以保證我食得飽。哈哈！（即係筆者唔夠人爭？）都係嘅，應該係懶囉，所以食自助餐就一定「蝕」。

去呢度最好預先BOOK位，同埋揀埋食咩餐。要留意嘅係，同行嘅人揀嘅都會係同一種餐。我哋去個日係星期六，價錢比平日貴些少，而餐廳就提供A、B 同C，3個餐（A: $368/位 B: $338 C: $398（另加一））朋友喜歡吃刺身，於是我們便選了A餐。

A餐獨有：刺身拼盤、活北海道毛蟹配火鍋、堂煎帶子伴黑魚籽、龍蝦……所有餐都包括：安格斯牛肉shabu shabu同環球海鮮自助餐、炭燒三文魚鮨、車打芝士培根脆件、金華火腿上湯娃娃菜及北海道3.6牛奶燉蛋白。要是有四人或以上的話，就可免費獲贈刺身船和燒雞［需預先預約］，多人嘅話真係抵啲！

刺身首先登場，看起來質素不錯，挺新鮮。重點係，如果唔夠喉，自助區有得任食添加，鍾意食刺身嘅朋友一定好開心！

限時2個鐘，梗係抓緊時間到外面睇下有咩美食岩食。原來都幾多嘢食，飲料選擇都多。

自助區有松葉蟹、凍蝦、青口、翡翠螺無限量任食，而火鍋配料選佔據一個角落；

    

除此之外，熱葷亦有如豬扒、西蘭花、炸魚手指、餃子、炒飯等等；

不過長龍不絕的就是即叫即開嘅生蠔！每次每人獲發2隻，因為即叫即開，所以這種安排亦可理解。不過每次都要排隊的確有點費時，大家要好好安排時間喇！

沙律和水果種類也多，甜品總是令女生瘋狂，而這裡的甜品除了蛋糕和雪糕外，特別不同的是有豆腐花，的確令人感到意外。

隻芝士焗波士頓龍蝦好吸引，一大隻拎到埋嚟，應該霸咗唔少位，相機畫面直頭畀佢塞爆……可想而知幾大隻。芝士味幾重，好惹味，香料又配合得好，我連啲殼都想食埋！

堂煎帶子伴黑魚籽用塊餅托住食，又幾得意。塊餅唔係稔嘅，幾脆口，所以整體口感幾豐富！

車打芝士培根脆件呢個幾有驚喜！最初我以為係好似蒜蓉包咁一片片，但原來係一大個咁上！啲芝士同煙肉勁香，包又烘得好香脆！正！

三文魚腩整得唔錯，生熟度岩岩好，肉質嫩滑。

我哋最後先食個火鍋。火鍋係粥底嘅。我哋首先將蟹放入去，令粥底吸收蟹味，之後再放安格斯牛落去滾，咁至係最 perfect！

啲蟹好多肉，你睇，啖啖肉，又清甜，好嘆呀！！

雖然牛肉唔多，但係每一片嘅安格斯牛肉都好正！脂肪同肉比例恰到好處，顏色睇上去亦新鮮……燙一燙，勁有牛肉味～～充滿住牛肉同蟹肉精華嘅粥，朋友諗都無諗，就清埋佢！

而我就留返個肚食甜品！呢個「北海道3.6牛奶燉蛋白」估唔到都幾好味～滑溜之餘，仲好有奶味！補下皮膚就岩曬喇！

如果餐廳開係旺啲嘅區，應該會多啲人識呢，但係價錢就可能會仲貴少少～如果大家想試，又唔想貴嘅話，就行多幾步啦！出咗葵興地鐵站，都係行10分鐘到啦～不過，去之前，最好訂位喇～因為座位唔多架！

搵食點：和藏

搵食方向：葵涌華星街1-7號美華工業大廈6樓D室

代價：$368（成人，另收加一）

*自助餐價格或有變動，收費以餐廳之最後公布作準